El Conceyu d'Ayer entregó los premios del so concursu epistolar

El Conceyu d'Ayer entregó esti vienres los premios del IX Concursu de Cartes d'Amor. Esti certame lliterariu-epistolar, al que se presentaron cerca de 700 cartes, y qu'acuta una estaya pa cartes n'asturianu y otra pa trabayos en castellanu, repartiendo en cauna d'elles 250 euros pal meyor trabayu y 190 pal segundu clasificáu nes dos categoríes, más otros 190 pa la meyor carta d'empadronaos n'Ayer, amás d'una flor y una estancia de fin de selmana nel Hotel rural de trés estrelles Ca'l Xabú, en réxime d'agospiu y almuerzu pa dos persones y con una ruta senderismu guiada pel conceyu d'Ayer.

Na categoría de cartes escrites n'asturianu la ganadora foi Andrea Canto Méndez, de Llangréu, y el segundu clasificáu Elías Fernández, d'Allande, mientres que na categoría de cartes en castellanu'l premiu marchó hasta Bonos Aires (Arxentina) d'onde llegó'l trabayu de Mónica Ogando Ferreira. El segundu premiu foi pa Roberto Malo Galve de Zaragoza, siendo'l premiu espedial pa empadronaos en conceyu d'Ayer pa Beatriz Fernández Álvarez, de Cabanaquinta. Les cartes ganadores tan espublizaes na web del Conceyu.