El Conceyu d’Ayer entama a asitiar carteles cola toponimia tradicional

El Conceyu d'Ayer al traviés del área de Cultura, entamó ayeri a fincar carteles colos topónimos tradicionales nos pueblos del conceyu. Les primeres doce
señales asitiáronse en dellos llugares d'Ayer y cuéntase con asitiar otros 30 carteles más a lo llargo de los próximos díes.


Felechosa, Col.lanzo, Yanos y L.levinco, ente otros, son los primeros topónimos ayeranos en llegar a les víes públiques, adelantándose incluso a l'aprobación oficial del llistáu de topónimos del conceyu en Conseyu de Gobiernu, que ta previsto que se faiga na sesión de güei miércoles, según fontes del Conceyu d'Ayer. De ser asina los topónimos ayeranos diríen xunto colos del conceyu de Nava, que se presentó con Ayer al trámite final pa normalizar los sos nomes de llugar.

Amás de los carteles toponímicos, el Conceyu d'Ayer asitió trés grandes paneles informativos, escritos n'asturiano, a la entrada de los estremaos valles del conceyu nos que se conseñen los principales núcleos de la zona y los llugares d'interés turísticu y cultural, como monumentos, hoteles o árees recreatives. Estos paneles tan asitiaos en Güeria, na entrada a Cabanaquinta, na salida de Col.lanzo pa contra San Isidro y na de Col.lanzo pa contra Casomera. Un cuartu panel va asitiase na zona de Piñeres d'equí a la vuelta poco. El coste de la iniciativa, que ye de 1.550 euros, finánciase al traviés d'una subvención de la Conseyería de Cultura.