El Conceyu contra la Incineración refuga l’usu de fondos públicos “pa financiar enerxíes sucies”

L’Alianza Global por Alternatives a la Incineración, de la que forma parte’l Conceyu, celebra esti vienres el Día d’Aición Global contra los Residuos y la Incineración. El coleutivu refuga l’usu de fondos públicos “pa financiar enerxíes sucies”.
 
Ésti ye’l décimu aniversariu d’esta xornada reivindicativa que, nesta ocasión, pon de relieve los aspectos financieros que permiten detener les subvenciones públiques pa la incineración de residuos y asegurar que los fondos estatales y mundiales pa la llucha contra’l cambiu climático, incluyíu’l Fondo Verde pal Clima nuevu, promueven sistemas de Residuos Cero, esto ye, meyores pal medioambiente, reducciones mayores de gases de efeutu invernadero y una eficiencia enerxética mayor, según los datos que manexa l’Alianza Global por Alternatives a la Incineración (GAIA, pol so acrónimu n’inglés). Esti coleutivu ta formáu por 650 organizaciones de 95 países y promueve “opciones llimpies y sostenibles pa la xestión de los residuos: la mengua y la separación nel orixe, la reutilización, el reciclaxe, el compostaxe y un conxuntu d’opciones que s’inclúin nes polítiques y programes conocíos baxo’l conceptu de Residuos Cero”, espliquen dendel Conceyu contra la Incineración.
 
L’asociación asturiana que refuga la instalación en Serín, nos terrenos de Coxersa, d’una planta incineradora qu’apoya’l Gobiernu y los dos partíos estatales mayoritarios, consideren que “los creitos de carbonu pa teunoloxíes males nun sólo aumenten las emisiones de gases de efeutu invernaderu, sinón que tamién perpetúen la inxusticia climática y mengüen les oportunidaes de trabayu nel sector de reciclaxe”.
 
Gipuzkoa refuga’l proyeutu de la incineradora de Zubieta
 
La Diputación de Gipuzkoa, gobernada por Bildu, refugó ayeri la instalación d’una incineradora en Zubieta “tal como taba planteada”. Un pasu que va permitir abrir un debate ente la sociedá gipuzkoarra sobre la xestión de los residuos que foi perbién recibíu pol PSE-EE. Sicasí, la so construcción tovía permanez nel aire.
 
Otra manera, el sábadu tuvo llugar una concentración na población d’Alcora, na provincia de Castellón, onde tamién ta planteada la construcción d’una incineradora. 2.500 vecinos salieron a les cais d’esti pueblu de 11.000 habitantes pa protestar contra la instalación nel municipiu d’una planta que refuga’l PP.
 
Na semeya, llugar onde ta previsto construyir la planta incineradora de Zubieta.