El Conceyu Abiertu pola Oficialidá de la Llingua celebra la puya poles obres d’arte a favor del asturianu

La plataforma Conceyu Abiertu pola Oficialidá y el "Foru Arte Ciudá" celebren güei miércoles la puya poles obres d'arte presentaes a la "III Amuesa d'Obres d'Arte pola Oficialidá de la LLingua Asturiana" na que participen 99 artistes asturianos nes disciplines de pintura, escultura, cerámica, composición, fotografía y nueves tecnoloxíes.

La puya pública va entamar a les 19 hores na sala d'esposiciones del Auditoriu Príncipe Felipe d'Uviéu, y la recaudación de les obres d'arte que se viendan va dir íntegramente a la financiación de les actividaes de la plataforma Conceyu Abiertu nel casu de los artistes que nunca participaren primero nes anteriores esposiciones pola oficialidá, mientres que nel casu de los veteranos l'artista va quedar col 50% de la recaudación pola so obra.

Los precios de salida de les obres entamen nos 30 euros, anque hai obres con preciu d'entamu de 1.900 euros, mientres que la obra de la "puya'l ramu" fecha pol artista Ánxel Nava y cola que va pesllase la esposición tien un preciu de salida de 3 euros.


Dempués de les esposiciones d'Avilés, na que participaron 55 artistes, y la de Xixón, na que participaron desinteresadamente 77 artistes, recaudándose ente les dos más de 11.000 euros poles 65 obres que se vendieron, la organización cuenta con repitir éxitu n'Uviéu y con facer más esposiciones benéfiques n'otros conceyos asturianos.

Na esposición amiéstense trés xeneraciones d'artistes asturianos que sofiten la cultura y llingua asturianes, rescamplando na temática de les obres la reivindicación cultural, social y llingüística, la crítica social y los temes de muyer na pintura asturiana.

Ente los artistes participantes de la primer xeneración alcuéntrense Fernando Alba, Nel Amaro, Elías Benavides, Bernardo Sanjurjo o Alejandro Mieres, mientres qu'a la segunda pertenecen Anxel Nava, Maite Centol, Pura Fresno o Pablo Maojo. La quinta de los más mozos cuenta con Fermín Santos, Charo Cimas, Noé Baranda o Juan José Pulgar, ganador del Premiu Astragal.