El Conceyu Abiertu pola Oficialidá prepara actividaes pal 2006

La plataforma pol reconocimientu de la Oficialidá del asturianu nel estatutu d'autonomía celebró ayeri una asamblea abierta que rexistró una gran asistencia de representantes de les más de 120 organizaciones que lu componen y na que s'apautó per una parte una estructura organizativa pa la plataforma y per otra definiéronse les primeres acciones reivindicatives a desarrollar nesti añu qu'entama y nel que'l procesu de reforma del estatutu d'autonomía asturianu va dar un reblagu.

No tocante a la cuestión organizativa, el CAO decidió dotase d'una riestra d'estayes de trabayu coles que garantizar una presencia continuada de la plataforma nos medios de comunicación y na sociedá, amás de garantizar la so función d'axente de diálogu colos sectores políticos y convertise nuna plataforma plural dafechu, con persones de distintes sensibildaes ocupando responsabilidaes nella. Pa ello, el CAO va funcionar d'agora en p'alantre al traviés de cinco estayes. La primera va ser la estaya de política, encargada de facer un siguimientu de l'actualidá política y les rellaciones con partíos, mientres que la segunda, que va llamase "xurídica y de documentación" va abrir un campu de trabayu nuevu pal CAO que va entamar a facer estudios y desarrollos propios nesti sentíu. Una estaya económica va normalizar el control d'aportaciones de los socios y los gastos de la plataforma.

La quinta estaya, encargada del desarrollu d'actividaes reivindicatives, va ser la que faiga un llabor más visible pa tola sociedá. Na reunión d'ayeri adelantáronse les sos primeres acciones pa esti añu 2006. La primera d'elles va ser una "caravana pola oficialidá" prevista pa últimos del mes de febreru, y con ella va intentar llevase'l mensaxe del CAO a los pueblos y villes que normalmente queden al marxe de les manifestaciones y actos entamaos pola plataforma. Tres d'ello, pal mes d'abril, el CAO ta preparando un actu de proyección pública con actuaciones musicales y discursos que tien fecha acutada pal 7 d'abril en Teatru Filarmónica d'Uviéu.

El CAO márcase l'oxetivu de la oficialidá como irrenunciable, y anuncia que'l so discursu va centrase en llevar el debate al tarrén de los derechos civiles, faciendo de la oficialidá una aspiración democrática que recueya nel estatutu la voluntá de toos y énte la que son los partíos asturianos los que tienen un deber y un derechu ciudadanu. Representantes del CAO que falaron con Asturies.com declararon que la plataforma va intensificar el so llabor de presencia pública pa personase en debates y meses organizaes por medios de comunicación pa retrucar les declaraciones que davezu faen políticos y personaxes públicos qu'ataquen la oficialidá colos argumentos de que supón "obligatoriedá y imposición".