El conceyal d’Educación y Cultura de Xixón pon el dorsal y súmase a Entaína

Naide nun quier perder la IV Entaína, la carrera de relevos del Día de la Reciella. L’últimu en confirmar la so asistencia ye Alberto Ferrao, conceyal d’Educación y Cultura, qu’amás de correr va participar nes actividaes d’esta iniciativa qu’entama Reciella “pa que les families tengan un día completu que puedan vivir n’asturianu”.

L’edil socialista participó xunto con David Guardado, de ‘Reciella. Families pol Asturianu’, na presentación del VII Día de la Reciella nel salón de receiciones de la Casa Conceyu, actu al qu’acudieron los ediles Yolanda Huergo, de Podemos-EQUO, y José Carlos Fernández Sarasola, de Ciudadanos. Tres destacar, emplegando l’asturianu, qu’una llingua “si nun s’usa, desapaez” y que “el conocimientu y usu de les llingües dende les primeres edaes favorez la capacidá de los neños y neñes de deprender otres llingües”, confirmó que “ehí me vais a atopar, poniendo’l dorsal p’acompañavos el próximu domingu y correr con vosotros y vosotres”.

Anunció tamién que, per primer vegada, la Oficina de Normalización Llingüística de Xixón, que bien collaborando col Día de la Reciella dende so aniciu, va contar con un espaciu propiu, y apuntó que “el Plan de Normalización Llingüística de Xixón recueye l’oxetivu de facilitar a les families l’usu del asturianu, pa lo que tamos planificando llinies d’aiciones qu’afalen que los neños y les neñes medren nuna ciudá na que tean presentes les dos llingües”. “Collaboramos na midida de los posible por que la fiesta del asturianu y la familia s’estienda más allá d’esti Día de la Reciella”, siguió Ferrao.

Ésitu de ‘¡Préstame pola vida!’

Guardado, pela so parte, esplicó que “tresmitir l’asturianu a los nuesos nenos y nenes” ye l’oxetivu col que nació Reciella. “Anque hai indicadores positivos, l’asturianu ye una llingua en retrocesu. Nun necesitamos encuestes o estudios; sábemoslo porque lo tenemos en casa. De xeneración a xeneración, piérdese. Lo que pretendemos, humildemente, ye trabayar dende la familia pa revertir esi procesu”, detalló'l miembru del coleutivu qu'esti añu va protagonizar el pasu del relevu que simboliza el trespasu xeneracional del idioma del so pá Chema pa depués treslladalu a los sos fíos Xana y Mael.

L’actividá principal de les munches entamaes a lo llargo del añu por Reciella ye’l Día de la Reciella, que l’añu pasáu recibió’l sofitu institucional del Plenu –asina como la tresmisión xeneracional del idioma– col apoyu de tolos grupos menos el popular. “Ye la visibilización d’esti procesu”, esplicó Guardado, una xornada “pa que les families tengan un día completu que puedan vivir n’asturianu, con actividaes d’entretenimientu y ociu, y tamién educatives, col asturianu como llingua vehicular”.

El respresentante de Reciella, integrante tamién del dúu Muga qu’interpreta xunto col Corín de Reciella ‘¡Préstame pola vida!’, cantar d’esti Día de la Recilla que ta siendo un ésitu en redes sociales, con más de 10.000 visualizaciones en Facebook y de 2.000 en YouTube, añadió que, al igual que’l mensaxe del tema, “lo que se pretende con esti día ye que se vea al asturianu como una cuestión positiva, guapa y normal”. Por último, animó a tola ciudadanía a participar el domingu en toles actividaes que se van entamar dende les 11.30 a les 19 hores nel Muséu del Pueblu d’Asturies, que son de baldre, a esceición de la carrera ‘Entaína’, qu’abre’l día, con un costu de 3 euros p’adultos y 2 pa menores.

La inscripción pa la prueba d’un quilómetru apta pa persones de toles edaes comienza a les 11 hores, anque ye posible facela de forma previa al traviés d’esti enllaz.

Na semeya, Ferrao en segundu planu mientres intervién Guardado.