El Complexu Cultural As Quintas va acoyer una esposición sobre pintura asturiana del sieglu XIX

Dende’l sábadu, y hasta’l 22 de mayu, el Complexu Cultural As Quintas, n’A Caridá, va acoyer una muestra de pintura asturiana del sieglu XIX. Les obres van proceder del fondu del Muséu de Belles Artes d’Asturies.
 
Na esposición va poder contemplase una seleición de 27 pintures destacaes del sieglu XIX de los 14 artistes asturianos más importantes que principiaron a trabayar nel segundu y tercer terciu del mesmu. Una opción perbona pa los habitantes del occidente d’Asturies de contemplar dalgunes de les meyores obres del muséu uviedín.
 
La collaboración ente’l Muséu de Belles Artes d’Asturies, el Conceyu d’El Franco y l’Asociación Amigos d’As Quintas empecipió nel 2009 cola esposición ‘Pintores del occidente asturianu’. Naquella ocasión espusiéronse obres d’artistes del sieglu XIX nacíos o vinculaos col occidente del país que taben nel muséu.