El Comité d’Espertos de la Carta Europea de la Llingües aconceyó n’Uviéu col Gobiernu, l’ALLA y coleutivos de tol dominiu

|
Conceyu Iniciativa pol Asturianu con Comité d'Espertos Carta Europea

El RIDEA acoyó les diferentes reuniones que los representantes del Comité d’Espertos de la Carta Europea de les Llingües Minoritaries o Rexonales celebraron el llunes pa facer siguimientu del cumplimientu de la mesma no que respeuta al dominiu asturlleonés. Centráronse nel periodu 2014-2016.

En concreto, los miembros del Conseyu d’Europa desplazaos a Asturies dedicáronse a confirmar los datos del ‘Quintu Informe Sobre’l Cumplimientu n’España de la Carta Europea de les Llingües Minoritaries o Rexonales, del Conseyu d’Europa (2014-2016)’ que presentó’l Ministeriu de la Presidencia y pa les Alministraciones Territoriales y conocer de primer mano la situación del idioma. El primer alcuentru foi col representante del Gobiernu asturianu, el direutor xeneral de Planificación Llingüística y Normalización Fernando Padilla, pa siguir depués con reuniones cola Academia de la Llingua Asturiana (ALLA), la Xunta pola Defensa de la Llingua Asturiana (XDLA), Iniciativa pol Asturianu y representantes del lleonés y l’estremeñu como El Teixu y OSCEC Estremaúra, de manera respeutiva.

Esti informe dedica nueve fueyes al asturianu n’Asturies nel apartáu ‘Llingües rexonales o minoritaries non oficiales’ amás d’una al lleonés en Castilla y Lleón a partir de la información dada por dambos gobiernos autonómicos al Estáu. Nelles esplica la situación llegal del asturlleonés y gallego-asturiano neses comunidaes y dalgunes de les actividaes desendolcaes nel periodu 2014-2016.

Nel casu del nuesu país fala del procesu de recuperación toponímicu, de la consolidación de los servicios de normalización llingúística enumerando dalgunes campañes entamaes nesi tiempu, les consecuencies de la entrada de la LOMCE y la situación nel Enseña y actividaes de la Universidá d’Uviéu o de l’ALLA, ente otres cuestiones que se trataron nes reuniones d’ayeri.

Falta de novedaes

“Espusimos que nun hebo novedaes nesti periodu dende’l puntu de vista normativu y d’aiciones de política llingüística con incidencia na sociedá asturiana”, esplicó Xosé Antón González Riaño, presidente de l’ALLA, que compartió alcuentru colos representantes de la XDLA. Esti coleutivu tamién espuso la so visión sobre la situación del idioma, al igual qu’Iniciativa pol Asturianu darréu, que destacó’l creciente consensu social y políticu alredor de la oficialidá y la falta de derechos llingüísticos anguaño.

Amás de pa tratar la situación real del asturianu, los representantes del Comité d’Espertos aprovecharon el viaxe a Asturies pa facer lo propio cola del gallegu. Asina, representantes del Gobiernu de Galicia y de coleutivos como A Mesa pola Normalización Lingüística desplazáronse a Uviéu pa celebrar aconceyamientos.

Na semeya, representantes d'Iniciativa pol Asturianu colos del Comité d'Espertos desplazaos a Asturies.

Contador Estadistiques