El Comisionáu pal Retu Demográficu, na conferencia d'Ástura

'La tierra quier xente: riesgos y oportunidaes del despoblamientu rural' ye'l nome de la ponencia que va protagonizar Izquierdo.

"Les aldees de güei necesiten munches coses, pero sobre manera necesiten sentíu de comunidá, llexislación propia y polítiques adautaes al mundu rural, que faigan fácil l'emprendimientu rural col envís de producir pa un mundu globalizáu", espliquen dende Ástura, asociación qu'entama tolos meses una conferencia sobre cultura asturiana en collaboración col Atenéu Obreru de Xixón. El Comisionáu pel Retu Demográficu del Gobiernu ye'l convidáu nesta ocasión p'abordar la cuestión del despoblamientu "non tanto dende'l puntu de vista del análisis y el diagnósticu, abondo tratao, sinón dende'l de les soluciones posibles y hipotétiques".

Nacíu en L'Infiestu nel 1958 y llicenciáu en Ciencies Xeolóxiques pola Universidá d'Uviéu nel 1981, Jaime Izquierdo vien trabayando dende'l 1983 como emplegáu públicu en mediu ambiente, mediu rural, ecoloxía aplicada y desarrollu territorial. Cola entrada d'Adrián Barbón nel Gobiernu, pasó a ocupar el cargu de Comisiónau pal Retu Demográfico, que depende direutamente del presidente, cola fin d'enfrentar esta problemática.

La conferencia va tener llugar mañana nel llar social del Atenéu Obreru de Xixón a les 19.30 hores. La entrada ye llibre.