El comienzu de la temporada d’esquí ta previstu pal xueves 30

|
El comienzu de la temporada d’esquí ta previstu pal xueves 30

Deportes decretó que la temporada d’esquí va comenzar el xueves 30 y va allargase hasta’l 1 d’abril, pero la falta de nieve en Valgrande-Payares y Fuentes de Invierno convida a pensar nun retrasu na apertura de les estaciones. Les tarifes de los bonos pa dellos díes y los bonos de temporada xuben una media del 8 por cientu.  

L’aumentu del preciu va dase na práutica totalidá de les modalidaes de billetes nes dos estaciones esta temporada, que tien como novedá el derechu a asistencia sanitaria pa tolos usuarios cola compra de cualesquier forfait, sacante los abonos de temporada –que se ponen a la venta güei nes dos estaciones o na Direición Xeneral de Deporte–, la creación d'un abonu añal pa persones con discapacidá. Mentes, en Valgrande-Payares va crease una tarifa pa los deportistes que prautiquen esquí de monte, tanto de día como de temporada.

La estación ḷḷeniza presenta tamién l’habilitación de cuatro nueves pistes con dos quilómetros de llargor y el desmonte de los históricos remontes en desusu cola adecuación de la redolada medioambiental. En Fuentes de Invierno, mentes, la gran novedá ye’l so parque móvil: una máquina pisapistes, que con un prespuestu de 350.000 euros más moto nieve, van empezar a trabayar esti iviernu.

Amás, volvió anovase pa esta temporada'l conveniu cola Diputación de Lleón pa potenciar la movilidá d'esquiadores y l'arribación de visitantes a les cuatro estaciones ivernices dependientes de dambes comunidaes: Valgrande-Payares, Fuentes de Invierno, San Isidro y Valle de Ḷḷaciana-Ḷḷeitariegos. L'alcuerdu va materializase nel usu de forfaits d'usu común o conxuntu y la promoción esterna de les instalaciones.

Esta iniciativa favorez que los abonaos de cualesquier de les estaciones esfruten de descuentos del 20 por cientu nos forfaits diarios nes otres trés y que puedan adquirir el bonu especial ‘Cuatro díes, cuatro estaciones’ que permite esquiar un día en caúna de les instalaciones del conveniu y repitir unu más, el quintu, naquella que l'usuariu decida.

Na semeya, Jorge Fernández Fierro, direutor de Fuentes de Invierno; José Ramón Tuero, direutor xeneral de Deportes; y Francisco Javier Martínez, direutor de Valgrande-Payares.

Contador Estadistiques