El colexu xixonés La Milagrosa recupera les hores d’asturianu que perdiera col entamu del cursu

Una reclamación d’Iniciativa pol Asturianu llueu d’una quexa del centru llevó a la recuperación de la totalidá d’hores na materia de Llingua Asturiana y Lliteratura nel colexu xixonés La Milagrosa. La Conseyería d’Educación atendió la demanda y rectificó la decisión tomada nel entamu del cursu de retirar hora y media selmanal pa la materia.

Foi’l 11 de payares cuando esta organización fixera treslláu a la conseyería de la situación na que taba’l colexu concertáu, qu’hasta esi momentu presentara alegaciones ensin algamar solución nenguna. Ésta llega agora, permitiendo a la docente contar coles 9 hores que necesita pa poner la materia en condiciones en llugar de les 7,5 coles que trabayaba hasta agora.

El cambiu que vivió’l centru esti cursu obligaba a la maestra a axuntar a los escolinos de terceru y cuartu nuna mesma clase, conformando un únicu grupu con más de 20 escolinos de diferentes edaes –una situación que nun se da na otra optativa, Cultura Asturiana–, perxudicando a les alumnes y alumnos matriculaos y al propiu enseñu de la materia. “A esto hai qu’añadir qu’esta situación de xuntanza de grupos podría provocar un cambéu d’optativa de cara al cursu siguiente, como yá pasó n’otros centros educativos en situaciones asemeyaes; munches families rechazaben esta xunión de niveles y camudaben la matrícula pal cursu viniente amenorgando la matriculación d’asturianu”, espliquen dende Iniciativa pol Asturianu.

Cola ampliación horaria, tolos cursos van contar coles 1,5 hores selmanales correspondientes y va poder ponese l’asignatura con normalidá. La organización “valora la confianza que’l profesoráu punxo na nuesa organización p’asoleyar esti casu y agradez a la Conseyería d’Educación tener en cuenta la reclamación”.