El colexu Evaristo Valle gana’l V Concursu ‘¡Ruempi la mollera!’

Esta selmana diose a conocer al ganador del V Concursu ‘¡Ruempi la mollera!’, qu’entama la Oficina Municipal de la Llingua de Xixón. El colexu Evaristo Valle foi’l primer clasificáu, per delantre del Príncipe de Asturias.
 
El concursu, que consiste nuna serie d’entrugues sobre la historia de Xixón o dellos personaxes conocíos del conceyu que los organizadores llanzen al mesmu tiempu a tolos colexos participantes, busca fomentar l’asturianu de manera divertida ente los estudiantes de llingua asturiana de tercer ciclu de Primaria. Una vegada que se conoz la pregunta, los escolinos y escolines trabayen sobre ella en clase.
 
L’Evaristo Valle foi’l ganador d’esti añu, mentes que’l segundu clasificáu foi’l Príncipe d’Asturies y, el terceru, el Federico García Lorca. Tolos trabayos participantes tán espuestos nel Centru de Cultura Antiguu Institutu.