El coleutivu Muyeres lleva a Xixón l’espectáculu ‘Inda Suenen’

L’Asociación Música Tradicional Muyeres y Factoría Norte van presentar esti sábadu, a les 20.30 hores nel Teatru Xovellanos de Xixón, l’espectáculu ‘Inda Suenen’. Nél van sonar 25 temes escoyíos ente’l repertoriu d’esti coleutivu musical.
 
“Inda Suenen representa una rotura coles formes habituales de presentación de los grupos de música tradicional n’Asturies. Supón un apueste novedosu no que se refier al tratamiento de la lluz, el soníu y el movimientu escénicu”, apunten dende Muyeres. L’ausencia de presentaciones y la participación na obra de l’actriz Ana Morán interpretando testos de Susana Sela y Borja Roces, como filo conductor de la historia, “crea’l calce necesariu pa llegar a los sentimientos de los espectadores y tresmitir les emociones presentes en cada una de les pieces”, continúen dende’l coleutivu ensin escaecer l’oxetivu principal de Muyeres; esto ye, “reivindicar y poner en valor el papel de la muyer na sociedá tradicional como creadora y tresmisora de cultura, guardiana d’un saber popular ampliu, intentando frayar los espacios restrinxíos a los que se vio reducida en demasiaes ocasiones”.
 
‘Inda Suenen’ ye un espectáculu desarrolláu a partir de la idea orixinal de Marisa Luque, con direición musical de Constantino Menéndez y direición escénica de Borja Roces. En total, son 90 minutos onde estes 17 artistes interpreten 25 temes escoyíos ente los sos cuatro trabayos dobles “que representen la diversidá y riqueza de la tradición musical asturiana”. David Varela, al curdión, y Llorián García, cola gaita, tamién participen na actuación. El preciu de la entrada pa disfrutar de ‘Inda Suenen’ ye de 10 euros.