El Coleutivu Ecoloxista d’Avilés, preocupáu por una xuba importante de los niveles de bencén nel aire

El bencén, un hidrocarburu cíclicu volatil canceríxenu, xubió un 39 por cientu na calidá del aire d’Aviles nel 2010 en comparanza col añu anterior. El Coleutivu Ecoloxista d’Avilés reclama al Gobiernu una investigación.
 
“Solicitamos una investigación al Principáu de les razones de que xubiera un 39 por cientu’l nivel del bencén na calidá del aire del año 2010 frente a los datos del 2009, a pesar de que les bateríes tuvieron una producción mas reducida qu’otros años al tar paraes pola crisis parte del añu”, señala’l Coleutivu Ecoloxista d’Avilés nun comunicáu. “El bencén (C6H6) ye un hidrocarburu cíclicu volátil que presenta alta reactividá con compuestos oxidantes”, esplicen los ecoloxistes, qu’apunten que “ta clasificáu como canceríxenu pola Organización Mundial de la Salud, inclusive en dosis mui baxes”. La esposición de duración llarga a niveles altos de bencén nel aire pue producir leucemia o cáncer de colon, ente otres enfermedaes.
 
La so presencia nel aire tien que ver, de manera principal, “a les emisiones producíes pola combustión incompleta de carbón y los derivaos del petroleu, asina como pol almacenamientu y distribución d’estos productos petrolíferos, basureros, fabricación y utilización de disolventes orgánicos y manufactura de determinaos productos químicos”, señalen dende’l coleutivu. Nel casu concretu d’Avilés, el mayor emisor de bencén ye Arcelor-Mittal, en concreto les sos bateríes.
 
Según espliquen los ecoloxistes, el valor máximu por llei de bencén nel aire ye de 5 microgramos per metru cúbicu, cifres que se superaron de forma amplia en delles ocasiones nel 2010. La datos recoyíos na estación de Llaranes del Serviciu de Calidá del Aire d’Asturies señalen qu’esti valor superóse en 56 díes del añu. Inclusive, el 28 d’abril el mididor rexistró 17,66 microgramos per metru cúbicu, lo que supón triplicar los valores permitidos pola llei. “Ta claro que’l Principáu y Ayuntamientu d’Avilés tienen qu’asumir les sos responsabilidaes y trabayar pa que s’amenorguen estos niveles elevaos de contaminantes producíos por una industria consentida en funcionar en precariu y un tráfico escesivu”, reclamen dende’l Coleutivu Ecoloxista d’Avilés.