El colector nuevu d’Avilés va entrar en funcionamientu en setiembre

L’Alministración Xeneral del Estáu entregó güei al Gobiernu d’Asturies la instalación, na que tien invertío más de 19 millones y que completa el saneamientu del estuariu. Va evitar que se viertan a la ría hasta 18 millones de metros cúbicos d’agües industriales

El conseyeru d'Infraestructures, Ordenación del Territoriu y Mediu Ambiente, Fernando Lastra, recibió güei de la Confederación Hidrográfica del Cantábricu (CHC) el colector interceptor de la marxe derecha de la ría d'Avilés, que recueye les agües industriales y les conduz al emisariu de Xagó. La infraestructura, que tien el so orixe nel conveniu suscritu en 1992 ente l'Alministración central, el Principáu y el Conceyu, completa'l saneamientu integral del estuariu, lo que va evitar l'arramáu d'hasta 18 millones de metros cúbicos d'agua d'usu industrial.

La instalación va entrar en funcionamientu en septiembre, en concluyéndose los axustes previos pa la so puesta en marcha, y les empreses van tener un plazu máximu d'un mes desque reciban la notificación pa conectase al colector, sacante Arcelor Mittal, que va disponer de trés.

La entrega de la infraestructura per parte de l'Alministración estatal al Principáu materializóse nun actu presidíu pol secretariu d'Estáu de Mediu Ambiente, Hugo Morán, y al qu'asistieron el conseyeru d'Infraestructures; l'alcaldesa del conceyu, Mariví Monteserín; el presidente de la Confederación Hidrográfica del Cantábricu, Manuel Gutiérrez, y el viceconseyeru de Mediu Ambiente, Benigno Fernández, ente otres autoridaes.

El colector, diseñáu pa un caudal máximu de 1,7 metros cúbicos por segundu, va incorporar los arramaos, primeramente trataos, d'Arcelor Mittal, Alcoa, Cogersa, Dupont, Fertiberia, Asturiana de Cinc, Cristalería Española y el Parque Empresarial de Principáu d'Asturies, pa conducilos al emisariu submarín de Xagó. Na zona d'ampliación portuaria pela marxe derecha de la ría d'Avilés tán previstes, amás, dos incorporaciones pequeñes pa futures industries, memo que pa'l mesmu puertu.

El control de los efluentes que s'incorporen al colector va realizase nes arquetes de conexón, onde s'instalaron los preseos pa evaluar la calidá del arramáu, según el so volume, que nun va poder entepasar los 18 millones de metros cúbicos al añu.

En tolos casos, les condiciones d'arramáu al colector tán afitaes nes correspondientes autorizaciones ambientales de cada industria, con oxetu de que les concentraciones de contaminantes cumplan los requisitos fitos na normativa autonómica vixente (Llei 5/2002 sobre arramaos d'agües residuales industriales a los sistemes públicos de saneamientu). Coles mesmes, la calidá del arramáu de forma conxunta nun tien de producir daños nel mediu receptor –la zona d'agües marines onde arrama l'emisariu-, en cumplimientu de les normes de calidá ambiental establecíes nel Real Decreto 817/2015, pol que s'establecen los criterios de siguimientu y evaluación del estáu de les agües superficiales y les normes de calidá ambiental.

Al tiempu, y atendiendo a les obligaciones derivaes del conveniu pa la protección del mediu ambiente marín del Atlánticu Nordeste, les empreses tendrán de realizar un siguimientu del mediu receptor, analizando semestralmente amueses d'agua de la ría y, añalmente, amueses de sedimentos nel área d'influencia del arramáu, que van determinar el conteníu en metales pesaos y compuestos orgánicos.

La Confederación Hidrográfica remató les obres, nes que s'invirtieren 17,6 millones, n'avientu de 2010. Les pruebes evidenciaron entós la necesidá de realizar arreglos y aumentar les midíes de seguridá pa evitar posibles arramaos a la ría. Tres diverses xuntes técniques, l'Estáu y el Principáu alcordaron instalar nuevos elementos de seguridá y executar meyores nes instalaciones col fin d'amenorgar los alivios que pudieren producise en casu d'avería. Con estes últimes actuaciones, la inversión final de l'Alministración Xeneral del Estáu na instalación xube a 19.045.000 euros.

La infraestructura consta de 17,6 kilómetros de tuberíes que pasen per Carreño, Gozón, Avilés, Castrillón y Corvera.