El Colectivu Ecoloxista d’Avilés pide qu’Asturiana de Zinc cumpla les normatives sobre emisiones

El Colectivu Ecoloxista d'Avilés presentó alegaciones a l'autorización ambiental integrada de la empresa Asturiana de Zinc, S.A. El grupu afirma que les instalaciones d'esta empresa faen un "eleváu impactu a la mala calidá ambiental de la comarca" y píden-y al Gobiernu asturianu que controle con más atención les actividaes de "la mayor fábrica de zinc del mundu y que tamién otres materies como l'acidu sulfúricu o'l sulfatu de cobre.


El colectivu pide qu'Azsa tenga que cumplir midíes de mengua d'emisiones a l'atmósfera y de control de la borrina sulfúrica que dacuando escapa de les sos instalaciones. L'altu consumu d'agua de la fábrica tamién apaez nes alegaciones ecoloxistes, que sorrayen que ye preciso baxar el gastu d'esti recursu por parte d'AZSA y tamién les condiciones en que lu devuelve al mediu natural, denunciando la falta de tratamientu de l'agua residual que sal de la fábrica y l'altu índiz de fluoruros, zinc y metales pesaos que vierte a la ría.
El reaprovechamientu de dellos residuos de la fabricación del cinc n'otros procesos industriales, el cumplimientu de les ordenances de ruiu y l'inxerimientu de midíes pa baxar el consumu de corriente de la planta, que ye ún de los mayores consumidores d'Asturies, apaecen tamién nel documentu d'alegaciones de los ecoloxistes.