El Colectivu Ecoloxista d’Avilés camienta que les autoridaes nun puen da-y el preste a la Térmica de Valliniello

El Colectivu Ecoloxista d'Avilés emitió esta mañana un comunicáu de prensa en qu'alvierte que "nun ve posible" que los organismos competentes en materia ambiental autoricen la central térmica de ciclu combináu que la empresa constructora Isolux quier asitiar en Valliniello (Avilés) con dos grupos de 500 Mw caún.

Como precedentes que xustificaríen la refuga pa la térmica avilesina, los ecoloxistes apunten a dos casos asemeyaos a los que'l Ministeriu de Mediu Ambiente-yos refugó'l preste. Trátase de les térmiques proyectaes pa Punta Verde en Sevilla y Algame en Badajoz, que les autoridaes ministeriales refugaron por incumplir el mandáu llegal d'asitiase a más de dos kilómetros del nucleu de población más allegáu. Los ecoloxistes asturianos afirmen que'l casu asturianu ye entovía más sangrín por asitiase la central a 500 metros del centru de la ciudá y nun llugar que tien nuna contornada de dos kilómetros de radiu una población de más de 100.000 persones. Los ecoloxistes avilesinos estimen tamién que, por poques emisiones contaminantes que puea tener una central d'estes característiques, estes van amestase a una atmósfera que yá ta mui castigada y que yá incumple la normativa de contaminación qu'apauten la llei 1073/2002 y la Directiva europea1999/6962.