El Club Xeitu entama’l III Certame Lliterariu en Pal.luezu Guzmán Álvarez

El III Certame Lliterariu en Pal.luezu Guzmán Álvarez, entamáu pol Club Xeitu, yá echó a andar. El plazu pa la entrega de trabayos termina’l 15 de mayu y cada persona va poder presentar tres creaciones, de prosa o poesía, como máximo.
 
Esti concursu, que lleva’l nome del filólogu babianu Guzmán Álvarez, tien como oxetivu revitalizar esta variedá del asturianu occidental faláu na montaña occidental astur-lleonesa. Pa ello ofrez un premiu únicu de 200 euros, diploma y una reproducción d’una obra del pintor Manuel Sierra fecha n’esclusiva pal certame a la meyor obra, ensin diferenciar prosa o poesía, como asocedió n’ediciones anteriores. Les persones interesaes en participar han d’unviar les sos creaciones en pal.luezu baxo nomatu y con un sobre zarráu colos datos del autor al apartáu de correos 59 de Vil.lablinu, códigu postal 24.100.
 
Les bases del certame establecen que los relatos han de tener un mínimu de 3 folios y un máximu de 12. Mentes, nel casu la poesía, ésta nun pue superar los 1.000 versos. El fallu del concursu conoceráse nel mes de xunetu y la entrega del premiu tendrá llugar nel branu nuna fecha por confirmar. La ganadora del añu pasáu na categoría de poesía foi Guadalupe Lorenzana con ‘La sulombra d’él’, mentes que’l de prosa quedó desiertu.