El ciclu de “música del Sieglu XX' de Caxastur fai un apueste polos artistes asturianos

La Obra Social y Cultural de Caxastur presentó ayeri la edición nueva del so tradicional ciclu "Música del Sieglu XX'", que va tener un calendariu marcáu pola presencia d'artistes asturianos. Ente otros músicos del país, van participar nel ciclu'l grupu Llan de Cubel, el cantante y compositor Toli Morilla, el cantautor Pablo Moro; el cuartetu de guitarra Entrequatre o la banda de folk "Asgaya", celebrándose les actuaciones d'equí al mes de mayu.

El que se presentó ayeri foi'l primer ciclu de "Música del Sieglu XX'" dientro d'esti añu 2007, en cuantes que la iniciativa va tener una segunda parte nos últimos meses del añu. Como ye vezu, Uviéu, Xixón, Mieres y Llangréu van ser los escenarios d'esti certame nel que tamién actúen músicos de toles procedencies y tendencies. El músicu de jazz Dave Samuels inauguró ayeri'l ciclu cola so actuación n'Uviéu y repite actuación güei en Xixón. La siguiente actuación na capital asturiana va ser el 21 de febreru, cola presencia del flamencu-tango d'Eva Durán, pesllando'l mes de febreru'l rock americanu de Terry Lee & Foingerbones. Los gaiteros irlandesos Eion Dillon & Frank Tate van tar en Xixón el día 22, mientres que Mieres va tener el sábadu 17 al cantautor Pablo Moro.

Gema Castaño, Manuel d' Oliveira, Electirk Consort, Anna Massie Band, LAU, Les Batinses, Benjamin Téhoval, Eleanor McEvoy, Chuck Loeb Band, Nayla, Danni Leigh; y Carlos Chaouen completen la llista d'artistes convidaos al ciclu.

Más información sobre conciertos na nuestra axenda d'ociu