El Ciclu de Folk de Cámara Ígor Medio programa trés conciertos

Leticia Baselgas, Elías García y Rubén Bada encárguense d'abrir esta edición del certame biañal con sede na casa natal de Xovellanos dientro 'Los Conciertos del Muséu'.

Juventudes Musicales de Gijón, entidá cola que colloboraba Ígor Medio, integrante de Felpeyu fináu nel 2006 nun fatídicu accidente de tráficu nel que tamién perdió la vida Carlos Redondo cuando'l grupu viaxaba pa tocar a Catalunya, entama'l Ciclu de Folk de Cámara Ígor Medio na so memoria. Nella reúne a dalgunos de los meyores músicos del xéneru en trés conciertos n'acústicu que van celebrase nos trés vienres que queden d'esti mes dientro de la iniciativa 'Los Conciertos del Museo' qu'acueye a lo llargo del añu'l patiu del Muséu Casa Natal de Xovellanos.

Mañana, a les 19.30 hores, va tener llugar el primeru de los trés programaos. La voz y la pandereta de Leticia Baselgas xúnense al bouzouki d'Elías García y a Rubén Bada, que tamién va cantar y tocar el violín y la mandola.

El día 23 el turnu va ser pa Gonzalo Llao (bouzuoki y voz), Pedro Sanjurjo (xiblata) y Miguel Villar (vigulín), mentes que'l 30 José Martínez Álvarez, esto ye, Ún de Grao, va acompañase otra vuelta de Pepín de Muñalén (flauta y saxo) y Tony Cruz (contrabaxu). La entrada pa tolos conciertos ye de baldre hasta completar aforu.

Na semeya, Bada, Leticia Baselgas y García.