El Ciares pon a la venta’l llibru colos meyores rellatos del so concursu lliterariu de temática futbolera

Nel campu La Cruz y na Llibrería Paradiso yá ta disponible pal públicu’l llibru que recueye los meyores rellatos del concursu lliterariu de temática futbolera del Ciares. Pablo Texón firma una de les trés histories ganadores: ‘Música antiguo’.

Editáu por Suburbia Ediciones, el llibru entituláu ‘Entre Líneas. Relatos en torno al fútbol y la Vida. I Premio de Narrativa Breve UC Ceares’ axunta los 12 meyores rellatos del mediu centenar de testos que recibieron los organizadores; esto ye, los trés ganadores y los nueve finalistes. Nel primer grupu atópense dos rellatos en castellanu firmaos por dos músicos bien conocíos na escena musical estatal, como Igor Paskual (Babylon Chat y Loquillo), con ‘Zapatos de gamuza blanquiazul’, y Mar Álvarez (Undershakers y Pauline en la Playa), con ‘Footballet’; y ún n’asturianu, ‘Música antiguo’, de Texón, que cuenta la historia que vive Manolín, utilleru d’un equipu modestu de fútbol per trés décades, nel momentu de más esitu del club.

El xuráu del concursu, conformáu por David Artime, Xandru Fernández, Antón García, Vicente García Oliva y el secretariu del club, Miguel Lozano, tamién escoyó una serie de trabayos finalistes que lleven el premiu de salir espublizaos nesti llibru. Nesti grupu tamién tien güecu otra historia en llingua asturiana, ‘Orsai’, d’Antón Caamaño. Completen la llista  ‘And you want to travel wind’, d’Abel Vega; ‘La bola de Romero’, de Darío Santoyo; ‘Cosidita al pie’, de Rafael López Álvarez; ‘Skye’, de Javier de Sánchez; ‘Bestiario local’, de José Javier Cuadra; ‘El ascenso’, de Javier Martín Galindo; ‘De los campos de Tapiola a las playas de Gijón’, de Rubén Alonso; y ‘Palabra de Brujo’, de José Antonio González de la Cuesta.

El preciu d’esti llibru de rellatos venceyaos col fútbol, qu’incorpora una introducción por parte del organizador del concursu, Iñigo Arza, y un prólogu del periodista y escritor catalán Kiko Amat –amás d’un panexíricu d’Irvine Welsh y d’escritos de Jorge Gómez, de los responsables de Revista Panenka y de Miqui Puig, na contraportada–, ye de 7 euros. La xente de fuera de Xixón tamién pue facese con un exemplar al traviés del corréu electrónicu ucceares@gmail.com.