El Ciares entama unes xornaes “por un fútbol social y críticu”

L’UC Ciares, equipu xixonés de la Tercera División, entama esta fin de selmana unes xornaes “por un fútbol social y críticu”. Charres, música y fútbol componen el cartel de la iniciativa d’esti club que buscar recuperar la esencia d’esti deporte.
 
La direutiva entrante del Unión Club Ciares, presidida por Alberto Álvarez, garró a l’equipu xixonés esta temporada nun momentu complicáu no económico que llevó a los socios ciaristes a debatir una fusión posible col Llano 2000. Dende la so llegada al club, la llinia marcada pol equipu d’Álvarez foi la d’alloñase del fútbol negocio y recuperar los valores d’esti deporte entamando un proyeutu asemeyáu al del Sankt Pauli alemán o’l FC United of Manchester, club que xuega en categoríes inferiores d’Inglaterra pero con una gran masa social formada por aficionaos desencantaos del Manchester United que fundaron l’equipu tres venta del club d’Old Trafford a la familia d’empresarios estauxunidense Glazer. De momento, la fórmula del Ciares ta ganando apoyos ente l’afición xixonesa, que ta tornado a acudir a La Cruz a apoyar a l’equipu, como amuesa la bona entrada del primer partíu como llocal ante’l Llangréu–cola presencia de más de 300 aficionaos– y la gran cantidá d’abonaos nuevos que tien la entidá.
 
Siguiendo esta filosofía de recuperar un fútbol social y críticu, el club xixonés entama esta fin de selmana unes xornaes a les que tán convidaos aficionaos d’otros equipos que busquen desmarcase del nomáu ‘fútbol modernu’ y que van contar la so esperiencia, iniciativa a la que se sumen músicos asturianos de manera desinteresada con un conciertu güei nel Sweet 01, antigüu Savoy Drinks&Music, a partir de les 22 hores. El cartel d’esti festival nun tien desperdiciu: Igor Paskual, Nacho Vegas, Los Izquierdos, Asstrainers, Kings of Makaha y Guiller Momonje y las Muelas del Juicio Final. El preciu pal mesmu ye de 12 euros y, tres les actuaciones, va continuar la fiesta en La Folixa con una pinchada de Chiquita y Chatarra.
 
Enantes d’esti conciertu, a les 19 hores, va celebrase una charra en La Cruz baxo’l títulu ‘Fútbol y lletres’ na que ta prevista la participación del periodista David Artime, creador de la novela ‘La bufanda’, que trata sobre’l mundu ultra; Carlos Marañón, ex futbolista y direutor de ‘Cinemanía’; Miguel Barrero, periodista; Maxi Rodríguez, actor y escritor; y Boni Pérez, lletrista, guionista y escritor. Mentes, mañana, a la mesma hora, tendrá llugar la segunda charra baxo’l títulu ‘Alternatives nel fútbol negociu y les SAD’, na que van dar el so puntu de vista’l Club Accionariado Popular Ciudad de Murcia; Señales de humo, grupo d’aficionaos críticos del Atlético de Madrid; y la Federación de Accionistas y Socios del Fútbol Español (FASFE), xunto colos direutivos del Ciares. L’actividá d’esti segundu día de les xornaes va completase con un partíu ente socios del club y participantes na iniciativa, a les 17 hores en La Cruz, y con una pinchada de DJ Cearista en La Folixa a partir de la medianueche.
 
Como pieslle de les xornaes, yá’l domingu, va celebrase’l partíu correspondiente a la cuarta xornada de Lliga ente’l Ciares y el Condal, choque que va principiar a les 12.15 hores y nel que s’espera otra bona entrada en La Cruz.