El Cepesma avisa d'una “presencia importante” d’aguamales na costa

Les persones que quieran d’aprovechar el bon tiempu que vive Asturies ha de tener procuru a la hora de pegase un bañu na mar. El Cepesma detecta dende’l vienres una “presencia importante” d’aguamales nes costes del país.
 
Al traviés d’una nota de prensa, la Cooordinadora pal Estudiu y Proteición de los Animales Marinos (Cepesma) avisa que, dende la madrugada del vienres, observáronse grupos importantes de celentereos d’al menos trés especies diferentes. Estos animales taríen presentes a lo llargo de la costa central, sobre manera en playes y pedreros de Castrillón, Avilés, Gozón  y Villaviciosa. Rellata tamién qu’estos exemplares viéronse enantes en grupos mui abundantes ente la vertical de Tapia y la desembocadura del Navia, asina como ente San Esteban y el Cabu Peñes, a una distancia d’ente siete y diez milles.
 
El sábadu, la zona más afeutada foi la de les sableres de Gozón y, ayeri, la de Castrillón, siendo les especies más abundantes la ‘velela velela’ y  la ‘pelagia nocticula’, asina como la ‘aurelia aurita’. Namái la ‘pelagia nocticula’ presenta una condición de cierta  peligrosidá, al ser de toxicidá alta, yá que les otres dos son d’escasa o nula toxicidá. Hai que destacar tamién, anque non nun númberu importante, la presencia de l’aguamala ‘Physalia physalis’, bastante habitual nos branos asturianos, que tamién pue trayer complicaciones a neños y a persones mayores o con deficiencies inmunolóxiques.
 
Según informa’l Cepesma, la presencia  d’estes especies ye cada vegada más habitual, aunque pueden pasar desapercibíes al non tomar contautu cola costa. La población escasa de grandes  túnidos, tortugues y otros depredadores naturales por causa de l’aición del home, fai posible qu’estos celentereos sían especies n’espansión, siendo en dalgunos casos una verdadera plaga. Sicasí, lo que se ta viviendo estos díes n’Asturies nun se pue consider como tal y el bañu continúa permitíu nes sableres asturianes.