El Centru Social La Semiente vive un avientu cargáu d’actividaes

El Centru Social La Semiente de L’Entregu tien programáu un avientu cargáu d’actividaes que van tocar dellos temes. Los grupos de consumu y la soberanía alimentaria protagonicen la primer d'elles esti xueves a les 20 hores.
 
Eva, del Grupu de Consumu de Cambalache d’Uviéu, y Rizos, miembru del proyeutu de comerciu xustu Picu Rabicu de Xixón, van esplicar en qué consisten la soberanía alimentaria aprovechando la cercanía del Día Mundial de la Soberanía Alimentaria (5 d’avientu). Amás, tres la ponencia, va tener llugar un alderique nel que se pretende dar pasos na creación d’un grupu de consumu na cuenca’l Nalón dende La Semiente.
 
Pal 15 d’avientu, a les 20 hores, el periódicu Diagonal va ser el protagonista de los xueves del centru social de L’Entregu. Responsables de la publicación “qu'intenta dar voz a los movimientos sociales del Estáu y apurrir una visión critica del panorama estatal con una publicación quincenal” –y que se complementa con otres trimestrales de caráuter nacional, como Diagonal Asturies– van ufrir la charra ‘Diagonal, un periódicu distintu’. Otra manera, el sábadu 17, a les 11 hores, va celebrase un taller de regalos baxo’l títulu ‘Fai’l to propiu regalu’. Una actividá que pretende “que cada persona pueda, ensin gastar un céntimu o con bien poco dineru, iguar regalos usando materiales nuevos, reutilizaos o reciclaos” nestes feches onde se dispara’l consumismu.
 
Amás, La Semiente va continuar celebrando tolos miércoles, a les 20 hores, el cine-fórum y convida a toles persones a averase al centru pa conocer el proyeutu y facer usu llibre de la so biblioteca.