El Centru Niemeyer yá ta preparando la so inauguración, que va celebrase la fin de selmana del 27 de marzu

Woody Allen y la New Orleans Jazz Band, Víctor Manuel y Martn’alia son les actuaciones musicales previstes pa la inauguración del Centru Niemeyer. La plaza d’esta instalación cultural va acoyer estos conciertos abiertos a tol mundu.
 
El Centru Cultural Internacional Óscar Niemeyer va inaugurase la fin de selmana del 27 de marzu con música, esposiciones, talleres y debates, actividaes que van contar cola presencia de personalidaes de fama mundial como los brasileños Pelé y Pablo Coelho, o’l cineasta estauxunidense Kevin Spacey, ente otros. Asina, estos convidaos y tolos avilesinos van poder asistir a l’actuación de Woody Allen y la so banda, la New Orleans Jazz Band, prevista na plaza del Centru Niemeyer pa la nueche del 25 de marzu.
 
Mentes, el sábadu, el protagonismu musical va ser pal mierense Víctor Manuel y pa la brasileña Martn’alia, fía de la lleenda de la samba Martinho da Vila. Esta actuación y la del vienres son de baldre y abiertes a tol públicu, siguiendo la idega cola que l’arquitectu Óscar Niemeyer creó esta ubicación del centru: “Una plaza abierta a tol mundu, un llugar pa la educación, la cultura y la llibertá”.
 
Quién paez siguir ensin tener güecu nel proyeutu del Centru Niemeyer ye la llingua y la cultura asturianes, escaecíes dende un primer momentu pola Fundación del centru cultural y pol Gobiernu d’Asturies. Nin la programación prevista pa esti añu nin la páxina web del Niemeyer tienen en cuenta la llingua del país.