El Centru Niemeyer refuga acoyer el Conciertu pola Oficialidá

La intención de la Xunta pola Defensa de la Llingua Asturiana y Xunta Moza de llevar al Niemeyer la vixesimoquinta edición del Conciertu pola Oficialidá nun va poder facese efeutiva. La direición del centru cultural avilesín nun dio permisu.

D’esta forma, esta celebración nun va volver, con motivu del so vixesimoquintu aniversariu, a la ciudá que la vio nacer nel 1989. “Pa dar acoyida al conciertu pensemos nun espaciu simbólicu de la que se quier imaxe nueva d’Avilés: el Centru Niemeyer. Un espaciu y una esplanada qu’al paecer del so diseñador habíen tar abiertos a la participación del pueblu. Pero bien se sabe qu'una cosa ye la teoría y otra la visión más prosaica de los nuestros próceres y allegaos”, señalen dende la XDLA. Los sos responsables reuniéronse colos d’esi espaciu cultural y lo qu’atoparon foi una amuesa “de la ideoloxía real que’l poder tresmite a esti tipu de, como-yos dicen, ‘contenedores culturales’: nun se busca la igualdá o la participación, sinón simplemente la fachada, l'apariencia o asonsañamientu brutu”. En definitiva, “punxeron sides pa nun dicir que nun queríen actos reivindicativos de la oficialidá: nun había feches, yera demasiao tarde, yá se reunió'l patronatu..., pero si-yos viniere la propuesta de cualquier estrella, reconocieron, yá lo iguaben pa que pudiere actuar en pocos díes”.

Esta situación lleva a la XDLA a “llamentar y denunciar el vetu ridículu y prevaricador que recibimos pa la realización del conciertu nes instalaciones del Niemeyer. Porque si yá ye grave’l fechu en sí, más grave ye que s’aluda a normes y reglamentos qu’a la fin resulta que sólo tienen que cumplir unos y non otros”. Por último, el coleutivu cívicu quier destacar que la castra política asturiana, en nome de la cultura y la participación, xenera "un discursu y unes polítiques que tienen como resultáu un decoráu de cartón-piedra pa favorecer y, sobre too, xustificar l’apartheid y llavar l’auto-odiu". El XXV Conciertu pola Oficialidá tendrá finalmente llugar nel mes de xunu –la fecha habitual yera últimos d’abril– n’otra población, posiblemente Xixón. Amás, Xunta Moza va celebrar un ‘preconciertu’ pola oficialidá’l sábadu 27 d’abril nel CSOA La Madreña.