El Centru d’Interpretación del castru Chao Samartín va exhibir materiales de la zona procedentes del Arqueolóxicu

El Conceyu de Grandas de Salime va roblar un conveniu cola Conseyería d’Educación y Cultural pa formalizar el depósitu de materiales de la cuenca del Navia nes instalaciones del Centru d’Interpretación del castru Chao Samartín. Éstos formen parte de la coleición del Muséu Arqueolóxicu d'Asturies.

El documentu establez que va poder autorizase la exhibición o caltenimientu de materiales n'otros centros o llugares abiertos al públicu distintos del Muséu Arqueolóxicu d'Asturies, siempre y cuando cumplan les condiciones afayadices pa ello, dando preferencia al so allugamientu na zona cola que tengan venceyu. Amás, l'alcuerdu afita les midíes de seguridá, control y caltenimientu de les pieces arqueolóxiques y les condiciones de manexu y usu de los fondos, conforme a les condiciones que rixen pa la consulta de los depósitos de la instalación museística con sede n’Uviéu.

Nel área de la cuenca del Navia punxéronse en marcha delles iniciatives pa potenciar los recursos culturales y naturales de la zona, ente los que destaquen los referentes a la numberosa representación de la cultura castreña. No que se refier al castru de Chao Samartín, el Gobiernu lleva invertíos 2.395.562 dende’l 2004, siendo ésti l’espaciu arqueolóxicu al que se dedicaron más fondos públicos nel periodu mentáu pa investigación y puesta en valor.

La mayor parte de la inversión destinóse a la construcción del centru d'interpretación venceyáu al castru, fechu mediante un conveniu col Conceyu. Con una dotación de más de 1,5 millones, llogróse que, na actualidá, el Chao Samartín cuente con una instalación centrada na esplicación de la so importancia histórica y na esposición de parte de los restos materiales qu’apaecieron nes diverses campañes d'escavación.

Cola autorización d'esti conveniu, va dase cumplimientu a los oxetivos de custodia, caltenimientu, proteición, divulgación y puesta al serviciu del públicu y de los investigadores de los materiales arqueolóxicos oxetu del depósitu, amás de garantizar que la so xestión tea al cargu de persones cola calificación téunica afayadiza.