El Centru Asturianu de Barcelona entama nes sos instalaciones una edición nueva de la Nueche Celta

La Bandina la Curuxa va participar nel VIII Festival Nueche Celta qu’entama esti sábadu’l Centru Asturianu de Barcelona. Nél tamién actúa Andecha por Raigañu, nome de la banda de gaites de la entidá, ente otres formaciones.
 
Esti eventu ye’l de más repercusión de los munchos qu’organiza’l centru asturianu de la ciudá condal a lo llargo del añu. Les instalaciones curioses que la entidá posee nel barriu de Sarrià acueyen una nueche especial entamada pa facer disfrutar a la emigración asturiana y a los y les catalanes con una amuesa de música asturiana y d’otros países del arcu atlánticu. Asina, amás de La Bandina la Curuxa y d’Andecha pol Raigañu, tamién van actuar City of Barcelona Pipe Band and Fergus Muirhead, nome de la banda de gaites del Centro Galego de Barcelona, y los bretones Meliouank.
 
Les actuaciones van principiar a les 20 hores y l’accesu a les instalaciones del Centru Asturianu de Barcelona ye de baldre. Los presentes, amás de música, tamién van poder disfrutar de la gastronomía asturiana y de la sidra.