El Centro Asturiano de Madrid entrega en Xixón los sos gallardones

Coincidiendo cola Feria Internacional de Muestres d’Asturies (FIDMA), el Centro Asturiano de Madrid entrega esti martes los ‘Urogallos de bronce’, gallardones añales colos que premia delles estayes. El de llingua asturiana ye pa Inaciu Galán.

Los ‘Urogallos de bronce’ creáronse nel 1986 como complementu a la ‘Manzana de oro’, gallardón máximu del Centro Asturiano de Madrid dende’l añu 1967. L’escritor y periodista xixonés toma’l relevu nesti premiu de Próspero Morán y pasa a formar parte d’una llista amplia de persones reconocíes por esta institución pol so llabor a favor de la llingua asturiana. La primer persona en recibir esti gallardón foi María Xosefa Canellada, a la que siguieron n’ediciones posteriores Xosé Lluis García Arias, Jesús Neira, Llorienzu Novo Mier, Xosé Álvarez, Luis Aurelio Álvarez, Julián Burgos, Florina Alías, Roberto González-Quevedo, Lluis Xabel Álvarez ‘Texuca’, Ediciones Trabe, Albino Suárez, Mánfer de la Llera, Ramón d’Andrés, Nené Losada Rico, Academia de la Llingua Asturiana, Dolores Sánchez ‘La Galana’, Ana María Cano González, Pablo Xuan Manzano, Milio’l del Nido, Mª Esther García López, Berta Piñán, Xuan Bello, Mariluz Pontón y José Sariego y Miguel Solís Santos.

La entrega d’estos gallardones va tener llugar a les 19.30 hores nel salón d'actos de la FIDMA, nun actu presentáu por Janel Cuesta y nel que tien confirmada la so asistencia l’alcaldesa, Carmen Moriyón; la presidenta del Conseyu de Comunidaes Asturianes, Paz Fernández Felgueroso; y el presidente del Centro Asturiano de Madrid, Valentín Martínez-Otero Pérez. Amás de Galán, tamién resultaron premiaos nesta edición con ‘Urogallos de Bronce’, Luis Montoto (Artesanía), Escuela de Baille Tradicional de Fitoria (Baille), Bibiana Sánchez García (Tonada), Grupu Coral San Pedro (Corales), Jorge Suárez Carbajal (Gaita), La Chalana (Gastronomía), Grupo de Montaña y Senderismo La Chiruca (Defensa de la Naturaleza), Fiesta del Asturcón (Festexos) y Albero Suárez Laso (Deporte). D’igual forma, reciben una mención especial l’Asociación pola Recuperación de Los Sidros y Les Comedies ‘El Cencerru’, de Valdesoto, y la Cofradía del Oriciu, amás d’Olvido García Valdés, nesti casu con mención honorífica.

Otra manera, a les 19 hores, tamién nel Recintu Ferial Luis Adaro, Telecable va recibir el títulu de ‘Entidá asturiana del añu’ qu’otorga esti centru qu’axunta a los asturianos residentes na capital castellana.