El cementeriu de Carbayín acueye un homenaxe a los 24 asesinaos en Curuxona

|
Cartelu homenaxe mártires de Carbayín 2019

El IX Asturies Arde en La Pola Siero inclúi una charra y un conciertu, ente otres actividaes.

Nora Antifa y Darréu entamen un añu más un homenaxe a los mártires de Carbayín, los 24 homes de la cuenca'l Nalón qu'asesinó la Guardia Civil en Curuxona la nueche 24 d'ochobre del 1934, una vegada finada la Revolución. Yeren Benjamín García, Agustín Amil, Melquíades Álvarez, José Meana, Laurentino Meana, Eloy Vallina, Honorio Vallina, Faustino Freigedo, Gumersindo Díaz, Tomás Centeno, Manuel Fernández, José María Vega, Cándido Díaz, Alejandro García, Ángel Vallina, Celso Rodríguez, Ernesto Pérez, Alejandro González, Dimas Yáñez, Antero Valdés, Gerardo Noriega, Antonio Flórez, Ernesto Vázquez, José Montes y Laudelino García y, tres delles tortures en venganza pol asaltu al cuartel de Sama mientres los fechos revolucionarios, quedaron enterraos en dos foses comunes.

"Los nomes d'estos homes son, de la mesma mena, los nomes de tantos homes y muyeres qu'entregaron la so vida nes sos aspiraciones revolucionaries", apunten los organizadores, que van entamar l'actu mañana a les 12.30 hores nel cementeriu de Carbayín, onde descansen agora los sos restos. Nun ye l'únicu actu previstu, yá que Nora Antifa entama tamién el IX Asturies Arde, con delles actividaes n'alcordanza de la Revolución d'Ochobre que comiencen esta tarde cola recoyida d'alimentos non perecederos nel Llar El Mataderu, en La Pola.

A les 20 hores Mariano Suárez, autor de '¿Quién escaeció a Belarmino Tomás?' (Andecha Llibros), va poner la charra '1934, l'ochobre que España nos quiso robar'. Yá mañana, Ocelt va realizar un graffiti y, dende les 20 hores, va tocar Ochobre, La Mueska y los vascos Egurra ta Kitto, activida pa lo que se solicita un sofitu de 5 euros.

AdxuntuTamañu
Image icon Cartelu IX Asturies Arde137.45 KB
Contador Estadistiques