El CEEI sofitó la creación de 31 empreses innovadores y 58 emplegos

El Centru Européu d'Empreses y Innovación (CEEI), dependiente de la Conseyería d'Emplegu, Industria y Turismu, sofitó la creación de 31 empreses altamente innovadores nel 2015, 15 d'elles de base tecnolóxica. Ello provocó la xeneración de 58 puestos de trabayu.

La función del CEEI ye l'asesoramientu a entamadores con iniciatives innovadores, ayudando a que definieran los sos modelos de negociu pa la so posterior puesta en marcha de forma individualizada. Tamién facilita a estes persones la participación n'aiciones y programes especializaos conxuntos de gran valor añadíu. En concreto, ente les iniciatives desenvueltes nel 2015, destaquen programes d'aceleración sectorial n'árees como l'ociu interactivu, la bioeconomía y la salú; asina como l’apoyu a la creación de la Unión d'Empreses de Videoxuegos d'Asturies-UNEVA.

Otra de les aiciones del CEEI consiste n'acompañar a les empreses nueves mientres los primeros años d'actividá pa impulsar la so crecedera empresarial. Esti llabor quedó bien a les clares si se mira l’altu índiz de supervivencia de les empreses innovadores con más de 5 años de vida y creaes col sofitu del CEEI, del 64,14 por cientu, lo que supón tar 21,7 puntos percima de la media estatal.

Esti organismu tamién intermedia ente les empreses y les entidaes y organismos financieros pa facilitar el desenvolvimientu de proyectos empresariales. L'añu pasáu ayudó a 34 empreses a llograr 2,4 millones d'euros. P'ameyorar les habilidaes de les empreses en materia de captación d'inversiones, el CEEI entamó tamién programes intensivos de capacitación 'investment readiness' pa defender el proyeutu empresarial énte entidaes financieres, inversores institucionales o inversores privaos y foros d'inversión.

Fanjul incorpórase a la xunta direutiva del EBN

La direutora del CEEI, Cristina Fanjul, incorporóse apocayá a la xunta directiva de l'asociación de CEEIs europeos, EBN (European Business Network). El so nomamientu tuvo llugar en Lund (Suecia), mientres la celebración de l'asamblea xeneral.

El currículu de Fanjul, centráu n'Europa y innovación dende va más de 15 años y con esperiencia en diverses redes de sofitu empresarial europees, foi clave pa la so eleición. Fanjul tamién tien esperiencia como evaluadora internacional del instrumentu pyme, l'innovador programa européu pa empreses fuertemente innovadores.

Esti nomamientu consolida la implicación del CEEI Asturies n'actividaes europees. Na actualidá, participa en dellos grupos de trabayu internacionales n'estayes como la financiación, la bioeconomía y el sector creativu.