El CD San Martín, al borde del desaniciu al nun poder afrontar les sos deudes

L’equipu de fútbol de Sotrondio, el CD San Martín, nun va presentase esta fin de selmana nel campu La Corredoria pa xugar contra l’Urraca. La situación económica del club ye crítica y podría retirase de la preferente.
 
El Club Deportivo San Martín, fundáu nel añu 1950, debe toles fiches federatives d’esti añu y foi incapaz de pagar depués de llegar a alcuerdos d'aplazamientu cola Real Federación de Fútbol del Principáu d’Asturies. Ayeri, los socios celebraron una asamblea na que namái participaron 18 persones que nun se decidieron a apoyar la propuesta d’un sociu pa formar una xestora que se fixera cargu del club. Ante esti panorama y la decisión tomada de nun viaxar a Posada’l domingu pa enfrentase al Urraca (16.45 hores, La Corredoria), la situación del club d’El Florán ye crítica.
 
De momento, Jesús González Hevia permanez al frente del club que militó per última vegada na Tercera División na temporada 2005-2006 y qu’agora ta al borde del desaniciu, anque ye más que posible que los cinco equipos de les categoríes inferiores que tán compitiendo anguaño (xuvenil, cadete, infantil, benxamín y prebenxamín) terminen l’añu. Nestos momentos, el club de preferente ocupa la plaza 17 con 25 puntos, dos perriba del descensu que marca la Sociedad Cultural y Deportiva Campomanes. L’ausencia en dos partíos conlleva la espulsión de la competición, según la normativa.