El casu de Cangas del Narcea pasa al Comité d'Espertos del Pactu Antitresfuguismu

La Comisión de Siguimientu del Pactu Antitresfuguismu celebrada baxo la presidencia de la ministra d'Alministraciones Públiques, Elena Salgado, decidió unviar al Comité d'Espertos los casos del conceyu asturianu de Cangas del Narcea (Asturies), amás de los conceyos gaditanos de Chiclana de la Frontera y El Puerto de Santa María.

Nel casu de Cangas del Narcea, los conceyales del PP apoyaren como alcalde al cabeza de llista d'Izquierda Xunida, xunto colos trés conceyales d'esti grupu.

D'esta manera, el PSOE nun algamó l'alcaldía y frayóse'l pactu a nivel fedral ente PSOE y IX d'apoyar al candidatu más votáu de cualquiera de les dos formaciones pa les alcaldíes.

El secretariu executivu de Política Municipal del PP, Juan Manuel Moreno, recalcó que'l so partíu suspendió la militancia de los sos conceyales por frayar la disciplina de partíu, Montserrat Muñoz (IX), tamién destacó que la coalición suspendió la militancia de los sos ediles y pidió que-yos dexen finar a ellos mesmos los espedientes ya abiertos d'espulsión o sanción, al tiempu qu'aseguró qu'una vez qu'acabe esi procesu internu, van aportar tola documentación a la Comisión d'Espertos.

El secretariu de Política Municipal del PSOE, Álvaro Cuesta, pela so parte, quiso dexar claro qu'anque esti casu se remite a la Comisión d'Espertos, nel senu del pactu existe'l "sentimientu mayoritariu de considerar que se trata de tresfuguismu".

La Comisión de Siguimientu sí vio tresfuguismu nel casu de los conceyales del PP denunciaos ante la mesa de Santiago-Pontones (Jaén) y Castril (Granada) y encargó al comité d'espertos que dictamine si los ediles del PSOE beneficiarios en caún de los casos tamién cometieron tresfuguismu.