El Castillón d’Antrialgo formará parte del Inventariu del Patrimoniu Cultural d’Asturies

Berta Piñán, conseyera de Cultura, Política Llingüística y Turismu, anunciu qu’El Castillón d’Antrialgo, nome que recibe esti castru del conceyu de Piloña, va pasar a formar parte del Inventariu del Patrimoniu Cultural d’Asturies (IPCA). Ésti ye’l segundu nivel de proteición esistente, tres el de Bien d'Interés Cultural (BIC).

La escritora visitó esti sábadu’l xacimientu en compañía del alcalde, Iván Allende, y de la conceyala de Cultura, Azucena Iglesias, amás de col alcalde de la parroquia de Villamayor, Andrés Rojo, y los arqueólogos Juan Muñiz y José Antonio Longo. La inclusión d’El Castillón d’Antrialgo nel IPCA completaráse enantes d’un plazu de 16 meses, siempre qu’algame un informe favoratible previu d’al menos una institución consultiva y tres un periodu d’información pública.

“Lo importante agora ye esti apoyu nuevu decidíu dende la conseyería al traviés de les víes que tenemos pa que se puedan siguir faciendo les campañes” nel castru, destacó Piñán. Nos dos años últimos dellos trabayos arqueolóxicos documentaron, ente otros restos, una vía antigua de posible orixe romanu, parte d’un muru esterior y torres que podríen tener una función de control y defensa de dichu camín, buelgues de cabañes con paredes construyíes con cañes y barru sobre cuerpu inferior de piedra, y cachos cerámicos y metálicos d’época antigua y medieval.

La relevancia d’esti xacimientu ta nel ámbitu nel que s’asitia, yá que mientres años hebo un vacíu na zona oriental d’Asturies respeuto a la llocalización de poblaos castreños. El so emplazamientu ta sobre la llomba principal ente la riega La Goleta, al norte, y el ríu Piloña, al sur, dominando l’amplia vega del Piloña hasta Villamayor.

El llugar recibe’l nome de El Castru o El Castillón d’Antrialgo, y una de les sos finques ye conocida como La Torre. Na parte alta d’esta elevación percíbese la construcción d’un zarru perimetral que contribúi a un aterrazamientu artificial qu’acomoda la orografía natural pa ufrir una plataforma superior mayor, sistema que presenta delles factures distintes, ofreciendo una anchura de paramentos qu’algama los 2,5 metros.

Na lladera occidental atópense delles construcciones de planta circular y una muria tresversal que condicionen el trayeutu d’un camín enllosáu qu’arrodia l’allugamientu y entra nel castru per un accesu en clavícula asitiáu na vertiente sur. La incorporación d’El Castillón d’Antrialgo nel IPCA permitirá tamién al Conceyu de Piloña “acceder a ayudes que tán nes llinies de subvención de la Direición Xeneral de Patrimoniu” pa la so conservación, destacó Piñán na so visita a la zona.

Na semeya, Piñán llega a la llomba onde s'asitia El Castillón d'Antialgo.