El cartafueyu “llengües vives” asoleya un CD con música nes llingües del suroeste européu

"Llengües vives" el cartafueyu bimestral que dende Cataluña informa dende va 10 años sobre les novedaes y noticies que toquen a les llingües minorizaes del suroeste européu dende'l gallegu hasta l'occitanu, asoleyó estos díes un CD pa celebrar la so primer década d'esistencia nel que pue sentise a grupos que canten en gallegu, asturianu, euskera, aragonés, ocitanu y catalán.

El CD asoléyase col enfotu de facer visible la diversidá llingüística d'esti requexu del continente nel que conviven media docena de dominios llingüísticos minorizaos, y los grupos participantes nel mesmu son los gallegos Non residentz, Marful yEcléctica Ensemble; los vascos Fermin Muguruza, Sorkun y MAK; los aragoneses Mallacán, L'Orquestina del Fabirol y Eleutroxiloca; los occitanos Massilia Sound System, Mauresca y Gai Saber, y los catalanes Sisa & La Verbena Galàctica, Joan Miquel Oliver y Niu.
La participación asturiana cuerre al cargu del grupu de pop electrónicuMus, que yá collaborare n'otra iniciativa musical de "Llengües vives" el grupu de hip-hop K-Nalón y el conxuntu de folk electrónicu Xera.