El CAO presentó una gran manifestación pal 24 de payares

L'Hotel Regente d'Uviéu acoyó ayeri una asamblea xeneral del
Conceyu Abiertu pola Oficialidá (CAO), que sirvió de
presentación oficial de la manifestación que se va celebrar el
próximu 24 de payares peles casi d'Uviéu. Esta
movilización quier dar un saltu cuantitativu y cualitativu a les
movilizaciones a favor del asturianu aumentando la presión na cai
según se va acercando la reforma d'estatutu asturianu.

Nel salón d'actos del Hotel tuvieron presentes representantes
d'organizaciones polítiques, sindicales y colectivos sociales qu'iguen
el corpus de les más de 100 entidaes del CAO, arriendes de xente
independiente que quier sofitar col so trabayu personal. El portavoz del CAO
Fernando Ornosa presentó a los asistentes el calendariu de
movilizaciones pa esta seronda, qu'inclui dos caravanes pola oficialidá
y una gran manifestación pal 24 de payares. Les caravanes consisten en
decenes de coches, ye una convocatoria abierta, adornaos pa la ocasión
que percorren ún o varios conceyos d'una zona repartiendo
información sobre la necesidá de la oficialidá del
asturianu. Pa últimos de setiembre ta prevista una caravana pelos
conceyos d'Ayer y L.lena, mientres que l'últimu sábadu d'ochobre
la caravana circulará pelos conceyos del occidentales de Cangas,
Tinéu y Allande.

Tocantes a la manifestación del 24 de payares, la organización
busca dar un saltu organizativu plantegando la movilización a favor del
asturianu más ambiciosa hasta'l momentu. La manifestación
saldrá a les 18:00 hores de la Estación del Norte d'Uviéu
col recorríu habitual hasta la Plaza de la Catedral, pero la
novedá ye que se tán organizando distintes marches que lleguen a
Uviéu pa unise a la manifestación a la hora de la salida.Ello ye
que tán previstes pel momentu marches dende les cuenques del
Nalón y Caudal, Trubia, Siero, Xixón y Avilés, que
saldrán a distintes hores pa dir a pie hasta la capital y coincidir nel
entamu de la manifestación. Na asamblea del CAO tamién se
consideró que pa esta manifestación yera per importante cuntar
cola presencia de personaxes de relevancia o famosos que dean el so sofitu pa
la defensa de la llingua asturiana. El CAO apuesta por esta
manifestación porque piensa que ye necesario dafechu aumentar la
presión na cai cuando se ta acercando la reforma del estatutu, sobre too
cuando los partíos mayoritarios amuesen la intención de facela lo
más ceo posible.