El CAO presenta la "Caravana pola Oficialidá"

La Casa Cultura de L'Entregu va acoyer esti vienres 24 de febreru, a les cinco la tarde, la presentación del Conceyu Abiertu pola Oficialidá de Samartín del Rei Aurelio y la Caravana pola Oficialidá del asturianu. Nel actu van tar presentes persones del ámbitu de la cultura, como escritores, cantantes, actores, y miembros d'asociaciones que tan a favor de la oficialidá de la llingua asturiana.

La presentación va tar al cargu de Fernando Ornosa y Pilar Fernández, representantes del CAO. Ésta ye una organización qu'axunta asociaciones culturales, movimientos ciudadanos y partíos políticos pa trabayar en comuña por consiguir que l'Estatutu d'Autonomía d'Asturies reconoza l'asturianu como llingua oficial na Comunidá.

En Samartín, van sofitar esti trabayu xente como'l cantante Chus Pedro, el profesor Severino Antuñá. l'académicu de la llingua Xuan Manzano o los escritores Pablo Rodríguez Medina, Chechu García y Vanessa Gutiérrez.


Nel mesmu actu va presentase la "caravana pola oficialidá", un recorríu per Asturies entero que va pidir la participación de los ciudadanos nel movimientu de reivindicación llingüística. La caravana va entamar el sábadu 4 de marzu en Samartín del Rei Aurelio con un actu cultural nel Teatru Municipal de L'Entregu y fiesta pela nueche nel local Sierra'l Trabanquín.

El CAO afirma que l'oxetivu de toos estos actos ye "informar y concienciar a los ciudadanos de la necesidá de la oficialidá pa la llingua asturiana, que ye un patrimoniu de tolos asturianos al qu'hai que dar la dignidá que merez".