El CAO prepara la segunda “Caravana pola Oficialidá”

Dempués de la primer edición que se celebró va pocos díes pela Cuenca del Nalón, el Conceyu Abiertu Pola Oficialidá prepara pal día 1 d'abril una segunda edición que va facer el so recorríu pel conceyu Siero. Les actividaes d'esta caravana van tener una "etapa prólogu" el martes 28 de marzu pela mañana col repartu d'información y cartafueyos en mercáu de La Pola y con un programa d'actuaciones na Casa de Cultura polesa que va entamar a les 5 de la tarde cola participación del cuentista Milio'l del Nido, talleres sobre xuegos pa neños, la participación del grupu de teatru del Institutu Ríu Nora que va representar la obra "Maruxes y Xuanes" escrita por Montserrat Garnacho, y l'actuación de la Coral Santa María de Lieres.

Tres d'esta xornada, el CAO va entamar el sábadu 1 d'abril la caravana Pola Oficialidá. Una riestra de coches va visitar los llugares de La Pola, Lieres, Carbayín, Valdesoto, El Berrón, Cualloto y Llugones, allegándose tamién a los conceyos de Sariegu, Noreña y Llanera. La Caravana Pola Oficialidá ye una iniciativa de la plataforma Conceyu Abiertu pola Oficialidá cola que d'intenta llevar el debate sobre la oficialidá del asturianu a les villes y conceyos de pequeñu y medianu tamañu d'Asturies nos que normalmente nun se celebren otros actos reivindicativos sobre l'asturianu como se fai nes grandes ciudaes d'Asturies.

La celebración d'esta caravana en Siero va facese cola collaboración de l'agrupación de Siero de la Xunta Pola Defensa de la Llingua, que tuvo llugar el pasáu vienres en La Pola nun actu qu'enllenó la Casa de Cultura polesa.