El CAO píde que nun se dexe la oficialidá fuera del alcuerdu de gobiernu

El Conceyu Abiertu pola Oficialidá ofreció ayeri una Rueda de Prensa cola que dio por entamada la so actividá na llexislatura nueva. Nel so posicionamientu públicu, la plataforma, qu'axunta a más de 150 organizaciones y colectivos comprometíos cola oficialidá del asturianu recordó-yos a los partíos políticos que la oficialidá ye "la única ferramienta posible p'algamar un estatus de llegalidá qu'acabe cola non reconocencia d'un derechu civil democráticu como ye la falta de llibertá d'espresión de los falantes d'asturianu y de gallego-asturianu".
La organización esplicó que les elecciones autonómiques supunxeron un paréntesis nel so llabor xustificáu porque-y paeció preciso dexar el protagonismu en manes de los políticos.

Pasáu esti procesu electora, el CAO vuelve "a l'actividá pública y la movilización, pero tamién cola nuestra llinia de diálogu y esplicación a los representantes políticos buscando'l consensu pa la reconocencia de la oficialidá". Tocante al presente más inmediatu, dende'l CAO vese qu'hai "enriba de la mesa dos cuestiones qu'afecten sobre manera al futuru llingüísticu d'Asturies y que son el pautu de gobiernu y la reforma del estatutu d'autonomía".

La plataforma fexo un llamáu a la "responsabilidá individual" de caún de los parlamentarios asturianos y alvirtió que " La cuestión de la oficialidá tien que tar dientro del Pautu de Gobiernu porque va ser una cuestión central nesta llexislatura cuando entame'l procesu de reforma estatutaria" asegurando que lo contrario "entenderíamoslo como un fraude".
El CAO ye firme n'afirmación de que "la Oficialidá nun ye un cromu que puea cambiase por otres coses, ye un derechu civil qu'hai que conceder y non ye moneda de cambiu" polo que-y pidió esplícitamente a Izquierda Xunida-Bloque por Asturies-Los Verdes, formación más claramente comprometida cola oficialidá "que nun dexen fuera del alcuerdu de gobiernu esta cuestión". El CAO diz que defende "cualquier midida de promoción pa la llingua, pero nunca contraponiéndola a la idea d'oficialidá" y sorraya que "trenta años de promoción, defensa y apoyu nun valieron pa da-y la vuelta a una realidá a la que nun se pue retrucar: la mengua imparable de falantes y, polo tanto, el peligru de desapaición de la nuestra llingua".


La plataforma recuérda-y al PP el so compromisu electoral de buscar mayor consensu na redacción del artículu 4 del Estatutu d'Autonomía y aguarda que la Federación Socialista Asturiana-PSOE, "nun exerciciu de responsabilidá política y coherencia democrática, dea'l pasu que nun dio hasta'l momentu y solucione un conflictu llingüísticu que yá dura trenta años".

D'otra manera, la organización cultural "n'ast" emitió tamién un comunicáu nel que, énte les negociaciones ente PSOE-FSA y Izquierda Xunida pa la formación de gobiernu n’Asturies, recuérda-y a IX que "prometió la oficialidá na campaña electoral” esixendo públicamente’l "cumplimientu d’estes promeses electorales".