El CAO llama a actuar nos tribunales

El Teatru Filarmónica d'Uviéu acoyó esti vienres la convocatoria del Conceyu Abiertu pola Oficialidá na celebración d'un actu al favor de l'inxerimentu del asturianu na reforma del estatutu d'autonomía d'Asturies. Énte un teatru llenu, el portavoz del CAO Fernando Ornosa entamó'l festival xunto colos representantes de los más de 150 colectivos que formen parte d'esta plataforma cívica. El reconocimientu oficial del asturianu nel estatutu d'autonomía como "única ferramienta llegal" que pue garantizar el respetu a los derechos llingüísticos n'Asturies foi'l puntu central d'una intervención na que s'adelantó que, amás de reforzar toles canales de la negociación política cola perspectiva puesta na reforma estatutaria, el CAO quier que se lleve alantre desarrollar un intensu llabor nos tribunales pa denunciar los casos de discriminación llingüística de les que se tenga conocimientu, como nuna midida más pa visibilizar la situación d'inxusticia que se vive n'Asturies por causa de l'actitú de les fuerces polítiques mayoritaries, que-y nieguen el reconocimientu llegal que merez a la llingua asturiana.

Les "semeyes de familia" de los representantes de les organizaciones presentes nel CAO y del colectivu d'enseñantes d'asturianu dexaron pasu a les actuaciones musicales de la vocalista Anabel Santiago, el cantautor Toli Morilla y el grupu folk Felpeyu, mientres que'l gaiteru Xuacu Amieva echó'l piesllu al actu cola interpretación del himnu asturianu. Dende'l CAO recordóse-yos a los asistentes la cercanía de la convocatoria del Día de les Lletres Asturianes, que va ser el próximu día 5 de mayu y pal que la Xunta Pola Defensa de la llingua tien convocada la tradicional manifestación reivindicativa pel centru de la capital asturiana.