El CAO espera que más de 10.000 persones asistan a la manifestación d'esti sábadu n'Uviéu

El Conceyu Abiertu Pola Oficialidá espera una asistencia superior a les 10.000 persones na manifestación a favor de la oficialidá de la llingua asturiana qu'esta agrupación convocó pal próximu sábadu, día 24 de payares, n'Uviéu.
L'actu presentólu ayeri oficialmente en rueda prensa Fernando Ornosa, el voceru del CAO, foru qu'aconceya a más de 250 organizaciones polítiques, sindicales, sociales, culturales y de vecinos, en favor de la oficialidá de la llingua asturiana.


Una banderona d'Asturies va encabezar la marcha, siguida de la pancarta principal, sostenida poles siguientes persones confirmaes: Ana Cano (presidenta de l'Academia de la Llingua Asturiana), Maxi Rodríguez (actor y guionista), José Ángel Hevia (gaiteru), Amador Rodríguez (presidente de la Federación d'Asociaciones de Vecinos de Xixón), Francisco Llera (catedráticu de socioloxía de la Universidá del País Vascu), Berta Piñán (escritora), Ramón Lluis Bande (periodista), Pilar Quintana (colombiana presidenta de l'asociación Asturias Acoge), Chus Pedro (vocalista de Nuberu) y Xurde Blanco (de l'asociación de Xuristes pol Asturianu), anque nos próximos díes puen sumase otros nomes.
Tres d'ellos va desfilar una bandona de gaites en si bemol y tres d'ella una segunda pancarta de políticos y sindicalistes, a la que va siguir tol cortexu d'asistentes.


La marcha va salir a les 18.00 hores de la estación del Norte d'Uviéu y va finar na Plaza Porlier, onde va actuar el grupu Folk La Bandina, tres la llectura d'un comunicáu. Media hora enantes del entamu del actu, ta previsto que lleguen los participantes nes seis marches pola oficialidá, que van salir a primer hora de la mañana dende Avilés, Xixón, Siero, Mieres, La Felguera y Trubia.


Pa Ornosa esta convocatoria tien llugar en "un momentu central", pol procesu de reforma del Estatutu d'Autonomía. Nesti sentíu, quiso facer un llamáu a "PSOE y PP pa dicir claro y lo que ye'l problema de falta d'oficialidá", relacionándolu cola "discriminación y la represión llingüística". "Yo mesmu", esplicó, "presenté la solicitú de permisu de la manifestación na Delegación de Gobiernu, y la funcionaria tiróme'l papel a la cara por tar escritu n'asturianu". "Eso ye racismu", añadió.
Dende'l so puntu de vista, mientres nun haya oficialidá, "va tar rotu'l principiu d'igualdá que tanto propugna'l PSOE, pola falta de derechos civiles de los ciudadanos que quieran falar n'asturianu y pola desigualdá con respecto a los habitantes d'otres comunidaes onde tienen llingua propia".