El CAO aconceyó colos líderes d'Unión Asturianista

Los líderes d'Unión Asturianista (UAS) aconceyaron ayeri colos representantes del Conceyu Abiertu pola Oficialidá (CAO). La reunión inxértase dientro de la serie d'entrevistes que ta llevando alantre la plataforma pola defensa del asturianu con partíos políticos y organizaciones pa dar a conocer les sos propuestes de reconocimientu de la oficialidá na reforma del estatutu.

Na reunión, a la qu'asistieron pol CAO los sos representantes Xulio Casado y Fernando Ornosa, Xuan Xosé Sánchez Vicente y Sergio Marqués afitaron el so compromisu electoral pa declarar l'asturianu llingua oficial y d'ufiertar el so sofitu "económicu, políticu y funcional pa tolo que represente la cultura asturiana" comprometiéndose a potenciar l'usu del asturianu nos medios de comunicación como mediu pa llograr la so normalización. El líder del PAS criticó la política llingüística entamada pol gobiernu de coalición de PSOE y IX y enfotóse en que la oficialidá ayude a superar torgues al procesu normalizador del asturianu, como foi'l casu de la paralización de les ordenances d'usu de la llingua en Xixón.