El cantautor Haim Álvarez musicaliza’l poema ‘Esconsueñu’ d’Esther García Lopez pal so trabayu nuevu

‘Esconsueñu’, a partir d’un poema homónimu de María Esther García López, ye’l tema d’adelantu del trabayu nuevu d’Haim Álvarez, ‘Por un puñado de versos’. El cantautor, qu'asoleya un videoclip del mesmu, escoyó esti testu n’asturianu occidental qu’apaez nel llibru ‘El color de los días’ pol “impautu que me causó al lleelu y tol tema míticu que tien”.

Too entamó con un regalu. “Yá conocía a Esther de coincidir en recitales y un día entregóme esta obra. Al lleelu, foi’l poema que más me llamó l’atención pola figura del trasgu”, esplica Álvarez, qu’afirma que “nun tardé más d’un día en musicalizalu”.

“Va de los que vamos perdiendo, de lo que nos robó la vida y nos escuende, personificáu nel trasgu, que ye’l qu’escuende les coses que tenemos con nós alredor de casa. Ye una metáfora de tolo que vamos perdiendo a lo llargu del tiempu”, esplica García López sobre la so creación.

L’autora participa na grabación del videoclip del tema, realizáu por Néstor Fernández (Báltico), nel que’l cantautor fai una intepretación propia del poema, “porque eso ye lo guapo de los poemes, que toos son interpretables”. Ésti cuenta la historia “d’una neña qu’echa la culpa al trasgu y la doble visión que tiene d’adulta, cuando ve que nun foi’l trasgu’l qu’escondía les coses, sinón que foi la vida y va recuperándola”.

No que respeuta a lo musical, apunta que “ye la más pegadiza del discu”, lo que-y fixo escoyela como cenciellu del álbum. “Tien un estilu eclécticu, con toques folk, que ye a lo que convidaba’l trasgu, y tintes de jazz o inclusive de reggae”, esplica.

Cuatro poetes

“Prestóme munchísimu que fora Haim Álvarez el qu’escoyera esti poema pa musicalizalu y encántame como quedó’l resultáu final. Nun ye la primer vez que me musicalicen poemes, pero prestóme muncho esti trabayu porque Haim tien munchu talentu y tamién gustu pa componer y cantar”, apuntó García López sobre’l resultáu final, a lo qu’añadió que “el discu ye guapísimu”.

Ésti va asoleyase en mayu, lleva’l nome de ‘Por un puñado de versos’ y nél participen Alfredo Morán nos arreglos y Fernando Malva (La Nozal) na producción. Ye’l cuartu trabayu d’Álvarez, nel que l’uvieín musicaliza creaciones de poetes asturianos y ún propiu, camudando’l so proceder habitual: “Siempre faigo la melodía y depués la lletra, y nesta ocasión fíxilo al revés”.

Son, amás de García López, Aurelio González Ovies, David Fueyo y Antonio Ballesteros, madrilanu con rellación con Asturies. Toos ellos participen nel discu tamién con unos versos a partir de la idea ‘Por un puñado de versos’, que reciten y conformen el prólogu y l’epílogu.

Primer cantar n’asturianu

‘Enconsueñu’ ye’l primer tema n’asturianu del cantautor y posiblemente nun va ser l’últimu. “L’asturianu occidental yera cuasi desconocíu pa min y prestóme esta primer esperiencia. Yá tuvi a piques d’incluyir un cantar n’asturianu nel primer trabayu y por supuesto que podrá haber más nel futuru. Hai qu’apostar polo d’equí, polo de casa”, rescampla.

De momento, y a la espera del discu, yá hai dos feches confirmaes pa presentar estos poemes musicalizaos, a les que se sumarán más próximamente. Son el 2 de xunu en Carreño y el 3 en Somiedo.