El cantautor gallegu Marmo Trazos actúa nel CSA La Semiente

L'artista fai composiciones a mediu camín ente'l punk-rock y la música d'autor.

La historia d'Iago Lobato, más conocíu como Marmo Trazos, ye la d'un músicu caleyeru que lluchó contracorriente pa forxar el so propiu estilu. El d'A Coruña ye un artista multidisciplinar –músicu, compositor, poeta, guionista y hasta actor– qu'apurre a la música un nuevu llinguaxe.

"Los sos cantares, fuertemente apegaos a les mesmes esperiencies vitales del autor y les sos reflexones, convídennos a cuestionanos la gran estafa capitalista, a conectar cola Madre Tierra, a cuestionanos la manera na que vivimos y a suañar un mundu nuevu. Ensin dulda son cantares que te remueven per dientro, que Marmo resuelve siempres de forma inesperada, enérxica, orixinal y bien personal", apunten dende'l Centru Social Autoxestionáu La Semiente, qu'entama esti conciertu de baldre mañana a les 22.30 hores. El llocal de L'Entregu va abrir les sos puertes a les 20.30 hores.