"El cantar ye poco representativu"

Esta ye un de les conclusiones a les que llega Lisardo Lombardía nuna valoración que fizo p'Asturies.com sobre'l Premiu al Meyor Cantar n'Asturianu, entregáu pola SGAE va un par de selmanes.

Lisardo Lombardía tien claro de toes maneres que "a pesar de les duldes o decepciones que pueden haber alredor del premiu, considera que ye positiva la esistencia del galardón" sobre too porque "foi un premiu que s'arrancó a autores nel últimu momentu y ye un pasu alantre pal mundu de la música n'asturianu".

No que cinca a la polémica esistente respective al procesu de selección y a'l cantar ganador, el responsable de la discográfica Fonoastur considera que "El problema vieno de la precipitación que llevó a que nes preselecciones entraren cantares que d'aplicar criterios más precisos nun podríen ser seleccionaos", nesti sentíu Lombardía considera que " la lletra de Nunca mais (el cantar ganador) ta nun amestáu mui feble, y que d'aplicar criterios llingüísticos na selección nun podría ser seleccionada". Amás, Lisardo Lombardía apunta tamién que "el problema, aparte d'una mala preselección, vien de nun saber quien votó pa escoyer la triada final de cantares, si votaron los socios de tol estáu español o solo los asturianos".

En cuantes al estilu del cantar ganador, Lisardo considera que "pal mi gustu'l cantar no llingüísticu y no musical ye poco representativu de la música que se fai n'asturianu".