El camín de Santiago trai una nueche folk a Avilés

"Felpeyu" y Cristina Pato van protagonizar esti sábadu un conciertu nel Avilés va celebrar l'Añu Xacobéu col llema de "Avilés nel Camín de Santiago".

El conciertu va ser na Plaza'l Parche de la Villa del Adelantáu, y va entamar a eso de les 22 hores. Esti conciertu ta dientro del programa d'actividaes que lleva'l títulu de "Avilés nel Camín de Santiago",que sirve pa celebrar la Firma del Conveniu de cesión de la xestión del Albergue de pelegrinos a l'Asociación Astur-Galaica Santiago Apóstol d'Avilés. Ente otres coses, ta prevista una charra mañana xueves nel Centru Municipal d'Arte y Esposiciones (CMAE) a les 20 hores sobre'l camino de Santiago al so paso por Avilés, y la presentación del llibru de Casona "El peregrino de la barba florida", reeditáu con motivu del añu xacobeo 2004. Amás dende'l vienres hasta'l domingu va haber una carpa instalada nel Parque "Les Meanes" con esposición y venta de productos de Galicia, amás d'actuaciones de grupos folclóricos.

El sábadu llega'l pieslle d'esti "Avilés nel Camín de Santiago" col conciertu de "Felpeyu" y Cristina Pato. Los primeros n'actuar van ser los xixoneses a les 22:00 hores. El grupu sigue llevando pelos escenarios el so últimu discu YÁ! que tan bona acoyida ta teniendo ente los aficionaos al folk asturiano. Esti ye un grupu al que-y presta viaxar, va poco que tuvieron en Bruseles tocando, y agora yá tienen preparada una xira pa primeros d'esti mes de xunu per Polonia, onde va facer varios conciertos participando en dellos festivales.

Darréu de los asturianos va tocar la gaitera gallega Cristina Pato. Esta moza entamó la so carrera bien xoven, con solo 18 años yá tenía'l so primer discu en solitario depués de tar nun grupu de folk, "Mutenrohi", y ser gaitera de la "Real Banda de Gaitas de Ourense". Esti primer discu, "Tolemia" de 1999, foi 'l primer discu qu'editó una gaitera n'España y d'él llegaron a vendése 40.000 copies. Depués d'esti ésitu llegó en 2001 "Xilento", que ye una puntu y siguio nel estilu y carrera de Cristina Pato. Nel so directu mece lo tradicional con una potente base de pop, anque too queda marcáu pola enerxía que tresmite la gaitera, onde cualquier escenariu queda pequeño pa pueda movése como-y peta.