El calor toma Asturies nos díes previos a la llegada del branu

Asturianos y asturianes buscaron esta fin de selmana refrescase en playes y piscines poles altes temperatures, llegando inclusive a rexistrar la más alta en xunu en tol sieglu: 36 graos n’Ibias. El miércoles la zona central va tar n’alerta mariella.

Esi mesmu día, a les 06.24 hores, entra oficialmente el branu, anque n’Asturies podría decise que yá llegó’l sábadu. Esta fin de selmana’l calor tomó’l país, con temperatures altes que llevaron a miles de persones a la mariña a refrescase nes agües del Cantábricu.

Nel suroccidente, en concreto n’Ibias, rexistróse ayeri la temperatura más alta nun mes de xunu n’Asturies, al algamar el termómetru 36 graos. Mentes, n’Uviéu y en Xixón llegóse a les 30 y 28 graos, de manera respeutiva.

El calor va siguir estes xornaes, medrando sobre manera cola entrada del branu. L’Axencia Estatal de Meteoroloxía (AEMET) tien activada una alerta mariella de ‘temperatures máximes’ nel centru y nes cuenques, que podríen llegar a los 34 graos. Ésta entraría a les 14 hores y s’allargaría hasta les 20 hores.

Na semeya, predicción de l'AEMET pal miércoles.