El CachuFest, un certame qu'axunta cultura, tradición, patrimoniu y etnografía en Trabáu

Conciertos, visitas guiaes, una sesión de cine de temática sobre la despoblación, amueses de cocina y actividaes infantiles conformen el programa del CachuFest, que va celebrase del día 22 al 24 en Trabáu y ta acabante d’abrir el plazu pa inscribise nes actividaes, al tar munches d’elles llendaes. 6 Riales, Alienda, Guieldu y Eva Tejedor & Les Pandereteres van tocar nesta población de Degaña.

Cultura, tradición, patrimoniu y etnografía axúntense nel CachuFest, un alcuentru “pa poner de relieve la cultura y tradición del suroccidente d’Asturies, y en particular la maraviyosa tierra de los cunqueiros”. Trés díes d’actividaes que va arrancar con un ciclu de cine sobre despoblación nuna carpa que se va preparar como si fora un cine, con moqueta y flaires.

La sesión va arrancar a les 18 hores cola proyeición de ‘Soñando un lugar’ (Alfonso Kint, 2019), pa siguir a les 19 hores con ‘Honeyland’ (Tamara Kotevska y Ljubomir Stefavov, 2019) y finar a les 20.30 hores ‘El desvío’ (Pablo Tosco, 2020). A les 22.30 hores van entamar los conciertos nel llugar cola actuación de 6 Riales, mentes qu’Alienda va tocar a la medianueche.

El sábadu pela mañana van desenvolvese visites guiaes con inscripción, como una preba de vinu de la DOP Cangas en Bodegas La Verdea, un paséu a Zarréu pa visitar la esposición ‘¡Vuelven los aguilandeiros’ y una tercera a la Fábrica de la Lluz de Degaña, a lo qu’hai que sumar un conciertu acústicu de Farla Megía nun cortín. Tamién va haber actividaes pa la reciella na Escuela Antigua y va estrenase’l llargometraxe últimu d’Alex Galán, ‘Il mulín’, a les 18 hores, con entraes a 10 euros con espicha.

A a les 14 hores, mentes, va haber una amuesa de cocina con David Montes, del programa ‘El carboneru’ de TPA, y de nueche les actuaciones de Guieldu (22.30 hores) y Eva Tejedor & Les Pandereteres (00 hores).

Parrillada de despidida

Les visites guiaes de la xornada última, el domingu, son al Mulín de Rusil n’Ibias; al Pousadoiro, a l’aldea de Vilauril y al arte rural de María del Roxo; y a La Guarida del Cunqueiru. Llevólu’l Sumiciu va ufrir una sesión a les 13.30 hores en Casa Sebastián y el CachuFest va despidise con una parrillada a cargu d’Amante Libardón na carpa de la fiesta a un preciu de 15 euros.

Espacio Tormalo entama esti certame, que forma parte del proyeutu ‘Revitalización del territoriu rural del suroccidente d’Asturies al través del desendolcu de nueva ufierta cultural’ cola finalidá de potenciar y dinamizar la oferta cultural en zones rurales de Degaña, Ibias y Allande al través de la organización d’actividaes culturales al aire llibre asina como n’espacios abandonaos o infrautilizaos, en collaboración con La Guarida del Cunqueiru y Trabau Ecoturismo, y cuenta col sofitu de Nunatak Producciones y el Conceyu de Degaña. Esiste la posibilidá d’asistir al CachuFest con autocaravana, furgoneta o tienda de campaña, anque se solicita a los interesaos que se pongan en contautu cola organización énte la falta d’espaciu pa preparar el llugar.

Na semeya, cachos oficiales del festival con dos midíes, 260 y 500 milillitros, con un preciu de 15 y 20 euros, de manera respeutiva,  que se pueden personalizar col nome si s'acuten enantes del día 18. El so usu va tener un descuentu de 50 céntimos d'euru en cada consumición.