El cabudañu inevitable

La fecha del 11 de setiembre quedó escrita pa la historia en lletra gordo va xusto un añu, cuando Nueva York y l'edificiu del Pentágonu en Washington sofrieron los ataques terroristes más primarios y mortales que se ficieren nunca en suelu de la primer potencia mundial. Tolos medios de comunicación espublicen güei los inevitables númberos especiales recoyendo los momentos más dramáticos del día en que desapaeció'l World Trade Center. Dende equí recomendamos la visita a los webs del New York Times el de la CNN o el de l'axencia Associated PressTres l'ataque, el gobiernu de los EUA metiose nuna campaña de guerra "contra'l terrorismu" que llevó a la tropa americana a una campaña militar n'Afganistán y qu'agora ta axuntando fuerces y voluntaes p'atacar Irak. Del 11 de setiembre p'acá, medró'l gastu militar y en seguridá de los países del primer mundu, mientres que les llibertaes y derechos civiles llevaron un taragañazu tres d'otru en nome de la seguranza. El Informe de Desarrollu de les Naciones Uníes del 2002 espeyaba que, cuando la metada de la población mundial vivía n'estaos non democráticos, el fenómenu del once de setiembre podía poner otra vuelta de moda la idega de que la dictadura y los recortes de llibertaes son erbíes pa un mundu más seguru.