El Ca Beleño pieslla les sos puertes el sábadu

|
Ca Beleño

L'históricu chigre uviedín, llar del folk, llevaba más de 30 años abiertu al públicu.

Inauguráu nel 1987, esti sábadu'l Ca Beleño va servir les sos cerveces caberes. Frankie Delgado y Blanca Fresno dieron el pasu de zarrar les puertes del llocal asitiáu na cai Martínez Vigil pa centrase nel so otru proyeutu, la cerveza artesano Ordum.

Per esti establecimientu pasaron miles de músicos y d'aficionaos al folk, con conciertos y sesiones improvisaes que nos últimos años dexaron d'entamase por cuenta de la prohibición de tocar música en direuto n'Uviéu. Ésta foi, ensin dulda, una de les razones que lleven a los sos propietarios a tomar la decisión d'echar el pieslle na madrugada del sábadu al domingu depués d'una xornada na que de xuru nun van faltar los habituales del chigres y munchos vieyos veceros, dalgunos desplazaos inclusive d'otros llugares.

Sicasí, l'espíritu del Ca Beleño nun va morrer dafechu, yá que la fábrica de cerveza na que tán trabayando Delgado y Fresno en Boriñes va caltener dellos de los motivos que fixeron afamáu'l chigre más allá de les nueses llendes. Esta instalación, amás de permitir l'aumentu de la producción d'Ordum, va tener un espaciu pa beber esti productu y la posibilidá d'entamar conciertos o xornaes.

Contador Estadistiques